Bi armanca dabînkirina şert û mercên jiyan û xebitîna bi awayekî azad ên sermuzakerevanê pêvajoyê Rêberê Gelê Kurd Abdullah Ocalan û derxistina yasayên entegrasyanê ya demildest, bi pêşengtiya Tevgera Jinên Azad (TJA) û Meclîsa Jinan a DEM Partiyê ve meş hate lidarxistin. Li ser vê meşê hefteyek derbas bû. Di serî de dayikên aşitiyê jin, tevî qedexeyên kêfî yên Qeymeqamê Gemlîkê û gefên polîsan ku digotin ‘’em nikarin rê li ber Bûrsayiyan bigirin’’ jî derbasî perava Gemlîkê bûn û bi daxwaza azadî û statuya Rêberê Gelê Kurd Abdullah Ocalan israra xwe ya têkildarî aşitî û civaka demokratîk dubare nîşan dan. Parlamentera DEM Partiyê ya ku bi jinên TJA’yî re meşiya û bû şahida van kêliyên dîrokî, ji ANF’ê re axivî.
‘ÇÊNEKIRINA SERERASTKIRINÊN YASAYÎ DIBE SEDEMA DERKETINA BÊBAWERIYEKE MEZIN’
Parlamentera DEM Partiyê Adalet Kaya di destpêka axaftina xwe de bal kişand ser girîngiya tevlîbûna Rêberê Gelê Kurd Abdullah Ocalan a ji bo pêvajoyê û got ku çênekirina yasayên sererastkirinê dibe sedema bêbaweriyeke mezin. Adalet Kaya piştre anî ziman ku rastiyeke gel û rastiyeke jinan a li her derê bi awayekî zelal analîza pêvajoyê dike heye û got ku di encama tecrûbeyên salan de baweriya ji dersthilatdariyê re nemaye û ji bo pêşketina pêvajoyê divê sererastkirinên yasayî werin kirin. Kaya got: ‘’Gelê Kurd jî û jinên Kurdistanî jî Birêz Ocalan weke sermuzakerevan nas kirine û tayîn kiriye. Ji ber wê yekê dixwazin ku ew jî di şert û mercên wekhev de vê pêvajoyê bi rê ve bibe. Li bendê ne ku weke sermuzakerevan statuya siyasî û yasayî were naskirin û azadiya fîzîkî were dabînkirin.’’
‘DIVÊ BIRÊZ OCALAN BI QASÎ DEWLETÊ BI AWAYEKÎ REHET LI GEL HER KESÎ BIKEVE TÊKILIYÊ!’
Adalet Kaya bi bîr xist ku tevî Rêberê Gelê Kurd Abdullah Ocalan mîmar û sermuzakerevanê pêvajoyê ye jî li Girtîgeha Îmraliyê di bin şert û mercên tecrîdê de tê girtin û ev yek anîn ziman: ‘’Rayedarên dewletê diçin Îmraliyê û têkildarî pêvajoyê û şerê li herêmê nêrînan digirin lê belê van yekan tim bi awayekî veşartî dikin. Divê êdî ev bi awayekî zelal were kirin. Divê Birêz Ocalan jî bi qasî dewletê bi awayekî rehet bi hemû kesan re bikeve têkiliyê, agahiyan bistîne û li gel akademisyen û rojnamevanan hevdîtinê bike ku ji bo bidawîkirina şerê li Rojhilata Navîn bandora wê hebe. Ji ber ku di paradîgmaya Birêz Ocalan de bi rastî jî îrade û formuleke ku vî şerî bi dawî bike heye.’’
‘KESÊN KU DI NAVA CIVAKÊ DE BERBERÎBÛN AVA KIRINE DIVÊ VÊ DERIZÎNÊ JI HOLÊ RAKIN’
Adalet Kaya bi bîr xist ku tevgera jinên Kurd di nava têkoşîn û hewla avakirina vê paradîgmaya ku ji bo hemû gelan jiyanî ye de ne û got: ‘’Peyam û daxwazên me eşkere ne; divê şert û mercên jiyan û xebitîna bi awayekî azad ên Birêz Ocalan werin dabînkirin. Ji ber jin û hemû derdorên din Birêz Ocalan weke kesê ku wê ji bo gelan aşitî û azadiyê dabîn bike, dibînin. Birêz Ocalan şensek e û divê pêvajo bi qalibên teng ên siyasî neyê sînordarkirin. Ev deriyê dawîn ê beriya derketinê ye. Dewlet jî vê yekê dizane. Bêyî Birêz Ocalan ev pêvajo nabe. Sererastkirinên yasayî dikarin di nava demeke kurt de werin derxistin. Di encamê de divê ev berberîbûn ji aliyê kesên ku ev afirandine ve ji holê were rakirin. Ev yek di rastiyê de wê bi du sê daxuyaniyên rêveber û pêngavên polîtîk were çareserkirin.’’
