Piştî banga Rêber Apo ya dîrokî ji aliyê PKK’ê ve gelek gav hatin avêtin, lê dewleta Tirk jî heta niha ji bilî avakirina komisyonan gaveke şênber neavêtiye. Di heman demê de tecrîd li Îmraliyê dewam dike û mafê hêviyê jî ji bo Rêber Apo nayê dayîn. Têkildarî vê yekê Parêzer Mustefa Şêx Mislim ji ANF’ê re axivî û got, divê teqez û dimildest Rêber Apo bi fîzîkî azad bibe.
‘DIVÊ GAVÊN DÎROKÎ YÊN WEKÎ PKK BÊN AVÊTIN DA KU AŞTÎ WERE AVAKIRIN’
Mustefa Şêx Mislim diyar kir ku bi banga Rêber Apo re herêma Rojhilata Navîn wê di nava aramiyê de be û got: “Gelek aliyan ev pêvajo erê kirin, PKK’ê gav avêtin, lê dewleta Tirk tu gavên şênber neavêtiye. Tenê bi rengekî ragihandinî axaftin kir. Komîsyona ku hatiye avakirin, divê gavên ne kêmî gavên PKK’ê yên dîrokî biavêje. Di demên dawî de gelek caran PKK’ê gavên xwe avêtin, lê dîsa jî yek alî bû û dewleta Tirk ew agirbest paşguh dikir û êrîşên xwe dewam kir.”
‘DIVÊ RÊBER APO FÎZÎKÎ AZAD BIBE DA KU PÊVAJOYÊ BI RÊ VE BIBE’
Mustefa Şêx Mislim anî ziman ku divê êdî demildest Rêber Apo bi fîzîkî azad bibe û got: “Her kes li benda azadiya fîzîkî ya Rêber Apo ye. Bi azadiya fîzîkî ya Rêber Apo re wê di nava gel de baweriyek çêbibe, ji ber ku gelê me jî heta dawiyê bi Rêber xwe ve girêdayî û jê bawer e. Me dît ku ev çend salin bi tu rengî parêzer bi Rêber Apo re hevdîtinê nakin û astengiyan datînin pêşiya wan. Tenê li ser navê heyeta DEM Partiyê dikarin hevdîtinê bi Rêber Apo re bikin. Êdî dem hatiye Rêber Apo bi fîzîkî were berdan û Rêberê me vê pêvajoya aştiyê bi rê ve bibe.”
Mustefa Şêx Mislim di dawiyê de anî ziman ku gelê Kurd gelekî aştîxwaz e, şer naxwaze û got: “Mafekî me heye û divê li ser maseya diyalogê bê çareserkirin. Çawa me dît di dîrokê de gelek caran ji aliyê PKK’ê ve bangên aştiyê û rawestandina şer hatiye kirin, dewleta Tirk ew yek nepejirandiye. Gelê Kurd niha di qonaxeke gelekî xurt de ye, êdî em dixwazin aştî li seranserî Rojhilata Navîn bê kirin, ji ber ku çareserkirina mafê Kurdî aştiyê ji tevahî Rojhilata Navîn re jî tîne.”
