Cenazeyê şervanê QSD’ê Zagors (Îbrahîm Îbrahîm) 3’ê kanûna îsal di dema pêkanîna erka xwe de li gundewarê kantona Tebqayê şehîd bibû, îro bi merasîmeke girseyî li Pakrewangeha Tebqayê hat veşartin. Bi sedan şêniyên kantonê, koçberên Efrîn û Şehbayê, endamên Rêveberiya Xweseriya Demokratîk a Kantona Tebqayê, hêzên leşkerî, partiyên siyasî, meclisên sivîl, Kombûna Jinan a Zenûbiya, rêxistinên civaka demokratîk, şêx û rûspiyên eşîran û oldar beşdarî merasîmê bûn.
Merasîm bi rêzgirtinê dest pê kir. Piştre ji fermandarên Hêzên Komandos Abid Amûdê axivî û tevahî şehîdên azadiyê bi bîr anîn.
Abid Amûdê bi bîr xist ku ji Bendava Tişrînê heya Dêrazorê rojane êrîş û provokasyon li dijî herêmê têne kirin û got: “Hêzên me mafên xwe yên parastina rewa pêk tînin. Armancên êrişkaran wê neghêjin serî, ji ber ku em xwediyê fikir û dozê ne. Projeya me projeya neteweya demokratîk a li ser bingeha xwişk û biratiya gelan e.”
Abid Amûdê di dawiya axaftina xwe de soza şopandina rêya şehîdan da.
Hevserokê Meclisa PYD’ê ya kantona Tebqayê Mistefa El Nasir jî axivî û got, şehîdan bi xwîna xwe pira azadiyê çêkirin û rêya gelan ronî kir.
Piştre wesîqeya şehîd hat xwendin û radestî malbata wî hat kirin. Hevrêyên şehîd cenaze hilgirtin li ser milan û bi dirûşman veşartin.
