Komîsyona Hevgirtina Neteweyî, Xwişk-Biratî û Demokrasiyê, civîna xwe ya 5’emîn lidar dixe. Serokê Meclisê Nûman Kurtulmuş beriya civînê daxuyanî da. Kurtulmuş, got ku dê îro li Dayikên Aştiyê û Dayikên Şemiyê guhdarî bikin.
Kurtulmuş, got: “Êşên Tirkiye zêdetirî 40 sal in dikişîne, êşên me tevan ên hevpar in. Li gorî min divê mirov van êşan nede ber hev û nekeve nava hewldana ku êşekî bixe pêşiya êşa din.” Kurtulmuş, got ku hinek derdorên hewl didin pêvajoyê jehrî bikin hene û bi awayekî neyekser jî be Wekîlê Partiya Îyiyê yê Enqereyê Yuksel Arslan ku li ser medyaya dijîtal çendek îdia kiribû, rexne kir.
Kurtulmuş, wiha domand: “Hin kes, mijarên ku di vê komîsyonê de qet nehatine axaftin, di pêvajoyên beriya avakirina komîsyonê de qet nehatine rojevê, di tu pêvajoyên komîsyonê de ji hêla endamên komîsyonê ve nehatine parvekirin weke ku di rûniştinên veşarî de hatibin axaftin nîşan didin. Bi gotina herî sivik, ev yek provokatorî ye. Divê her kes li hemberî van derdorên di nava provokasyonan de hişyar bin. Her 51 endamên komîsyonê jî xwedî biyardariyeke hevpar in.”
Kurtulmuş, wiha dirêjî da axaftina xwe: “Bi rastî jî meseleya me ew e ku ev milet êdî van êşan nejî û gelê me di nava aştî, aramî û standartên bilind ên demokrasiyê de bijî û vê ji pêşeroja xwe re bihêle. Ji bo vê jî komîsyona me hemû berpirsyartiyên dikeve ser milê xwe bicih tîne. Ev komîsyona ku 11 partiyên siyasî yên Tirkiyeyê temsîl dike û ji 51 endaman pêk tê, heta niha jî di nava berpirsyartiyeke mezin de xizmeta xwe kir. Anku, me heta niha jî bi xizmeta bo aştî û aramiyê re xebatên komîsyonê heta roja me anîn. Em ê di demekî herî kin de temam bikin û hêvî dikin ku berpirsyartiya xwe ya li hemberî gelê xwe bi serkeftî bicih bînin.”
