DAKB’ê, di daxuyaniya xwe ya nivîskî de diyar kir ku têkoşîna ku bi qetilkirina Jîna Emînî ya li Tehranê re xuya bû, derbirîna daxwaza azadiyê ya jinan e ku bi salan e rastî zext û mudaxaleyan tên.
Di daxuyaniyê de, hat gotin ku di navbera berxwedana jinên Kurd ên li Rojava li dijî DAÎŞ’ê têkoşîn didin û tevgera “Jin Jiyan Azadî” ya li Îranê de girêdaneke xurt heye.
DAKB’ê, berxwedana girtiyên jin ên li Îranê bibîr xist û diyar kir ku divê jinên ku têkoşîna azadiyê didin, bi taybetî Pexşan Ezîzî, Werîşe Muradî û Nergiz Mihemmedî bi tenê neyên hiştin. Bang hat kirin ku girtiyên siyasî yên jin werin serbestberdan, zext, êşkence û darvekirin bi dawî bibin.
Di daxuyaniyê de, hat gotin ku jin encamên herî giran ên şer û pevçûnan dijîn û hat gotin: “Aştiyê jin tînin, jiyanê jin ava dikin.” DAKB’ê, bal kişand ser mafê jinan ê ku li ser jiyan, bawerî, laş û siberoja xwe biryarê bidin û destnîşan kir ku heta jin azad nebe civak azad nabê.
Daxuyaniya ku tê de hat gotin “Em jin di vê têkoşînê de pariyê hev, bêhna hev û hevrêyên hev in”, bi dirûşma “Jin Jiyan Azadî” hat bi dawîkirin.
