Komeleya Piştgirî, Alîkariyê ya Malbatên Girtiyan a Behra Spî ya Edeneyê (AATUHAY-DER), ji bo balê bikişîne ser binpêkirinên mafan ên li girtîgehan û rewşa girtiyên tevî ku dema înfazê qediya ye nayên berdan, li pêşiya Edliyeya Edeneyê daxuyaniyek da. Di daxuyaniya ku gelek kes beşdar bûn de, metna hevpar a daxuyaniyê ji aliyê Hevserokê AATUHAY-DER’ê Zahir Akalin ve hat xwendin.
Akalin bal kişand ser Pêvajoya Aştî û Civaka Demokratîk a ku dewam dike û diyar kir ku bi banga Rêber Apo re serdemeke nû ya bêşer dest pê kiriye û hêviyên aştiyê xurt bûne. Akalin diyar kir ku malbat û dayik li bendê ne ku deriyên girtîgehan bên vekirin û got, girtiyên siyasî jî li benda azadiya xwe ne û tevli jiyana civakî ya demokratîk bibin û di şert û mercên azad de tevkariyê li pêvajoyê bikin.
Akalin anî ziman tevî cezayê wan qediyeye înfaza gelek girtiyan tê şewitandin û destnîşan kir ku di demekê de ku hewldanên ji bo xurtkirina siyaseteke demokratîk û mayindebûna aştiyê civakî dewam dike de, sepanên ku azadiya girtiyan asteng dikin dibin sedema nakokiyeke cidî. Akalin anî ziman ku binpêkirinên mafan ên li girtîgehan nîşan didin ku zext girantir bûne û got ji bo normalîzekirina pêvajoyê divê nêzîkatiyeke adilane û wijdanî bê nîşandan.
Akalin banga li rayedaran kir û destnîşan kir ku divê dawî li bêhuqûqiyan bê anîn û got: “Divê azadiya hemû girtiyên li girtîgehan bê misogerkirin û sepanên ku şik û gumanan li ser pêvajoyê çêdiki bên dawîkirin û divê gavên berbiçav ên ku dê rêya aştiyê vekin tavilê bên avêtin.”
Daxuyanî bi çalakiya rûniştinê bi dawî bû.
