Komîsyona DEM Partiyê daxuyaniyek weşand û got, “Bi destpêkirina sala nû ya perwerdeyê re, pergala perwerdeya Tirkiyeyê, ji xizaniya zarokan û sînordarkirinên budceyê heya bazirganîkirina perwerdehiyê, bi karkerkirina zarokan û heya polîtîkayên zayendperest bi krîzên piralî re rû bi rû ye. Yek ji gavên herî watedar di çareserkirina van krîzan de ew e ku ji bo bi milyonan zarokan avakirina derfeta wergirtina perwerdeyê bi zimanê xwe yê dayikê ye.”
Daxuyaniyê bi vî rengî dewam kir:
“Îro, bi taybetî zarokên Kurd bi milyonan zarok, bêyî vê derfetê dest bi perwerdeya xwe dikin. Halbûkî perwerdeya bi zimanê dayikê garantiya pêşveçûna zarokan e ku wekî takekeseke azad bi nasname, ziman û çanda xwe ye mezin bibin.
Tirkiye di du salên dawî de di pêvajoyeke girîng re derbas dibe. Pêvajoya Aştî û Civaka Demokratîk armanc dike ku pergaleke demokratîk ava bike ku her kes û civak tê de li ser bingeha hemwelatîbûna wekhev û bi rûmet bi mafên xwerû bi hev re bijîn. Hewayeke civakî ya demokratîk, piralî û wekhev tenê dema ku mafên ziman û çandên cûda werin garantîkirin mimkun e. Ji ber vê yekê, garantîkirina ji hêla qanûnî û destûrî ve ya mafê perwerdeya bi zimanê dayikê, yek ji gavên herî girîng ber bi aştî û veguherîna demokratîk ve ye.
Misogerkirina mafê perwerdeyê, bi zimanê dayikê yê zarokan ji bo perwerdeyeke bi kalîte û aştiya civakî pir girîng e. Mafê “dersa hilbijêrkî” ya du saetan a heyî destkeftiyeke girîng e ku di encama têkoşîna bi salan û parastina zimanê dayikê de derketiye holê. Gaveke rastîn a ji bo avakirina li ser vê destkeftiyê ew e ku zimanê dayikê bibe zimanê perwerdeyê û ev yek were garantîkirin.
Zext û êrişên dawî yên li dijî saziyên zimanê Kurdî û heta munferît be jî êrişên li dijî kesên ku bi Kurdî diaxivin, ji bo provokasyonan zemînekê diafirînin. Pêşîgirtina li vê yekê û xurtkirina yekîtiya demokratîk tenê bi misogerkirina wekheviya rastîn di navbera zimanan de mimkun e.
Mafê zimanê dayikê me ji hev qut nake, berevajî me dike yek. Ev maf bingeha aştiya civakî ye û mafekî wisa ye ku nayê dewrkirin.
Di serî de Meclisa Mezin a Neteweyî ya Tirkiyeyê em bang li saziyên îdarî û sivîl û tevahiya civakê dikin ku di naskirina mafê perwerdeya bi zimanê dayikê de berpirsiyariyeke dîrokî bigirin ser xwe.”
