Li qada Sekoy Azadî ya bajarê Silêmaniyê bi dirûşmeya ‘Çarşema Yekbûnê’ bi beşdariya malbata şehîd, gelê welatparêz yê bajarê Silêmaniyê Şehîd Ehmed Hêmin yê ji Kerkûkê ku tevlî seferberiya giştî ya berxwedana rûmetê ya Rojavayê Kurdistanê bû, di berxwedana Hesekê de tevlî karwanê şehîdan bû di nav gelê Kurd de weke “şehîdê yekîtiya netewî” hat pênasekirin, hat bîranîn.
Peyama Eniya Piştevaniya Rojavayê Kurdistanê ji aliyê Rûbar Ehmed ve hate xwendin û tê de wiha hate gotin; “Şehîd Ehmed Hêmin Kerkûkî wek yek ji ciwanên Başûrê Kurdistanê ji bo parastina axa welat çû Rojavayê Kurdistanê. Em ji malbata wî re jî dibêjin ku Şehîd Ehmed ne tenê şehîdê we ye, ew şehîdê tevahiya Kurdistanê ye ku wekî şehîdê yekem yê Başûrê Kurdistanê di berxwedana rûmetê ya niha li Rojava tê kirin de ji bo parastina ax , xwişk û birayên xwe yên Rojava biparêze canê xwe feda kir.”
Mamê Şehîd Ehmed Hêmin, Cemal Ehmed jî di merasîma bîranînê de peyama malbata şehîd xwend û tê de wiha hate gotin; “Em spasiya gelê Kurd dikin ji bo rêzgirtina li Şehîd Ehmed, ku şehîdê her çar parçeyên Kurdistanê bû û bi xwîna xwe sînorên çêkirî şikand. Ji vir şûnde, wekî malbata şehîd, em soz didin ku emê li ser rêya têkoşîna azadiyê ya ku kurê me di oxira wê de şehîd bûyî têbikoşin.”
Her wiha Hevserokê KNK’ê Ehmed Karamûs jî di merasîma bîranînê de axivî û wiha got; “Şehîd Ehmed Hêmin ne tenê şehîdê Rojava ye, lê di heman demê de şehîdê her çar perçeyên Kurdistanê ye. Ew ji bo parastina maf, ax û welatê xwe şehîd bû. Ew şehîdê şeref û rûmeta gelê Kurd bû. Ew şehîdê seferberî û parastina rûmeta Kurdan e.
Armanca êrişa li ser Rojavayê Kurdistanê ne tenê dagirkirina Rojava bû, lê di heman demê de armanca sereke tunekirina destkeftiyên gelê Kurd bû. Lê heta ku şehîdên mîna Ehmed Hêmin û bi hezaran şehîdên din hebin ku jiyana xwe ji bo parastina axa her çar parçeyên Kurdistanê feda kirine, dijmin nikarin gelê Kurd tune bikin. Ez bang li rêveber û berpirsên siyasî û partiyên Kurd jî dikim ku bibin yek û yekîtiya neteweyî biparêzin.”
