Li gundê Mehle yê Şirnexê 7’ê Çileya 2020’an hevjînên hevdû Şimoni Dîrîl û Hurmuz Dîrîl ên Suryanî, winda bûn. Piştî 70 rojan cenazeyê Şimoni Dîrîl hate dîtin, lê hîna yê Hurmuz Dîrîl nehatiye dîtin.
Têkildarî bûyerê sala 2023’yan Apro Dîrîl hate girtin. Di çarçoveya lêpirsîna derbarê Apro Dîrîl de, qeydên telefonê yên ayîdê mehên Nîsan û Gulanê yên sala 2020’an derketin holê.
Di qeydên telefonê de Apro Dîrîl dema bi hin kesan re dikeve nava peywendiyê, derdikeve holê ku ji dewletê re dixebite û tê fêmkirin ku Dîrîl ji bo xwe rizgar bike bi israr alîkariyê dixwaze. Hin kesên di qeydan de navê wan derbas dibin jî, tevî daxwazên bi israr ên parêzeran jî hîna nehatine dîtin û nehatine lêpirsînkirin.
Parêzerên malbata Dîrîl diyar kirin ku bûyer divê tenê li ser Apro Dîrîl neyê nirxandin, di bûyerê de hin kesên din jî hene. Parêzeran daxwaza lêpirsîneke din jî kir. Lê şandeya dadgehê ev daxwaz qebûl nekir.
Di qeydên telefonê yên ketine dosyayê de, tê dîtin ku Apro Dîrîl gelek caran bi Nazdar Hamo û Selîm Oztunç re gelek caran axivî ye. Tevî daxwaza parêzeran jî, Dadgehê 6 salan xwe negihand Nazdar Hamo.
Li gorî qeydên telefonê, Apro Dîrîl gelek caran alîkariyê ji Nazdar Hamo dixwaze û diyar dike ku ew ji dewletê re dixebite. Li gorî qeydên HTS’ê, ev hevdîtin navbera Şirnex û Stenbolê pêk tên.
‘EZ ZILAMÊ DEWLETÊ ME’
Di 24’ê Nîsana 2020’an de navbera Apro Dîrîl û Nazdar Hamo ev axaftin derbas dibe:
Apro: Ew çi kaxez e, parêzer ji dozgeriyê wergirtiye.
Nazdar: Derewan dikin, tiştek wisa nîne.
Apro: Di nava kaxezê de, li derdora me çiqas bûyer çêbûne Apro agahî daye dewletê. Min jî gotiye ku hikûmet zilamê xwe nade diyarkirin.
Nazdar: Dewlet ti carî zilamê xwe diyar nake.
Apro: Kurê min tevahiya nivîsê xwendiye û dîtiye ku di bin nivîsê de îmzeya min heye. Gotiye dewlet tiştekî wiha nake, jixwe ez zilamê dewletê me. Dewlet wê piştgiriyê nede min.
Nazdar: Walla dewlet wê heta dawiyê piştgiriyê bide me, tu dewletê nafiroşî.
AXAFTINEKE DIN
Piştî bûyerê çend mehên din, 26’ê Nîsana 2020’an jî Apro Dîrîl û Nazdar Hamo van tiştan diaxivin:
Nazdar: Min îro li cem Kemal behsa te kir. Kemal got, heta dawiyê em li pişt wî ne. Bila ti carî netirse. Bila neke derd, heta dawiyê em pê re ne. Em niha derbasî lêkolînê bûne, em ê bişopînin, gelo ruşvet dane.
Apro: Parêzerê kurê Hurmuzê çûye, ji Beytuşebabê ji dozgeriyê aniye.
Nazdar: Ji dozgeriyê aniye.
Apro: Wisa gotin.
Nazdar: Em dişopînin, lê me naveroka wê dîtiba, wisa fotokopî falan.
Apro: Zarokê min ê li Stenbolê xwest, neda.
Nazdar: Em ê bişopînin. Em ê ji Beytuşebabê bipirsin, li ser bisekinin.
Apro: Jixwe ez ZILAMÊ DEWLETÊ ME. Divê belgeyên wiha nîşanî ti kesê neyên dayîn.
Nazdar: Rast e.
Apro: Ez xemgîn dibim. Mesela ez dayîme BTO midûr, ew çiye. Wan jî înfaza min daye.
Nazdar: Eger kî kiribe, em ê bavêjin hundir. Ev sûcek e. (…) Em vê mijarê lêkolîn bikin, kî xiyanet kiribe em ê bibînin.
Apro: Temam, 6’ê Gulanê dadgeha min heye.
Nazdar: Hîna 3-4 roj mayîn, em ê bi dozgerê li wir re hevdîtinê bikin. Ez ê têkildarî vê mijara dadgehê bi Kemal re baxivim, ew ê jî ê bi dozger re baxive, em ê bêjin vê mijarê bigire.
HEVKARIYA BI DEWLETÊ RE, MÛHBÎRÎ
Têkiliya Apro Dîrîl a bi dewletê re, di qeydên telefonê de di axaftina bi Selman Oztunç re kirî de, derdikeve holê. Di qeydan de tê gotin ku Apro Dîrîl ev demek dirêje mûhbîrtiyê dike û lewma ji aliyê dewletê ve tê parastin, lê tevî vê jî hîna xwe di ewlehiyê de hîs nake.
Qeyda hevdîtina 4’ê Nîsana 2020’an bi vî rengî ye:
Selman: Apro, em roja borî axivîbûn.
Apro: Erê.
Selman: Fermandarê qelekolê got, em ê biçin wêderê, tiştek yan jî ciheke ku dizane yan jî jê bi guman e. Min jî got, çûye Hursî. Wî jî got, ez dizanim çûye Hursî. Weke cih tu kuderê dizanî, ji me re bêje.
Apro: Keşe (papaz) Remzî, bi Apoyiyan (Endamên BTO’yê) daye kirin, pere daye xwarin, bavê wî daye kuştin. Îfadeya min li cem Remzî ye, nîşanî milet dide.
Selman: Ez ê ji serbaz re bêjim, ev kaxez çiye bila bipirse.
Apro: Keşe Remzî gotiye, îfade li cem parêzer e. Ew ê jî bide dozger û wê min bavêjin hepsê. Ew kaxez nîşanî Dawûtê me dane, wê nîşanî rêxistinê jî bide. Gotiye, rêxistin wê bavê te bikuje. Min got, fotokopiya wê kaxezê bişînin, neşandin.
Selman: Serbaz got, li Apro bigere, gelo cihên xwe spartinê dizane?
Apro: Walla zilamê min li Şirnexê heye.
Selman: Ez zilamê te yê li Şirnexê dizanim, nas dikim.
Apro: Min ji zilamên li Şirnexê re got, nehatin. Min jî jixwe ji Halît re got.
Selman: Gelo ew jî li wan cihên ku tûp lê hene, ye?
Apro: Erê ew jî li wir in.
Selman: Te beriya niha gotibû, leşker hêzê li qadê datîne. Gelo ew çi bû?
Apro: Hinekan li vir Apoyî dîtine, lê nizanim çi kirin. Lê Apoyî derketine êdî.
Selman: Çend kes bûn?
Apro: Behsa deh (10) kesan dikirin, lê raste yan derewe nizanim.
Selman: Teqez derew e.
Apro: Heta ku ez bi çavê xwe nebînim, bawer nakim. Ez bibînim jixwe ez ê yekser agahî bidim Şirnexê û te jî. Jixwe di şeşê (6) vê mehê de li Amedê dadgeha min heye.
Selman: Wê dadgehê taloq bikin, ji ber vê vîrûsê.
APRO DÎRÎL ALÎKARÎ DIXWAZE
Di axaftina Apro Dîrîl a 2’yê Gulana 2020’an bi Selman Oztunç re kirî de, tê dîtin ku alîkarî dixwaze:
Apro: Dewletê divê ew kaxez nedaba wan, ez di nava zehmetiyê de me.
Selman: Parêzer jî, dozger jî wê mudaxile bike.
Apro: Kurê Hurmuzê got, parêzerê me ew kaxez ji dozgeriyê wergirtiye. Dewlet çawa wê kaxezê dide wî.
Selman: Temam, ez ê jî pirs bikim.
AXAFTINA 12’Ê NÎSANÊ
Di qeydên HTS’ê yên axaftina Apro Dîrîl a ku 12’ê Nîsana 2020’an bi Nazdar Hamo re kirî de, tê dîtin ku hin kes tên îxbarkirin:
Nazdar: Birayê min tu çawayî, çi dikî?
Apro: Başe walla. Min îro du kes dîtin, aslan genîn li wan deran e.
Nazdar: Li pişt kuderê?
Apro: Li pişt pira jorê min du kes dîtin.
Nazdar: Çûn kuderê, te nedît?
Apro: Ez ditirsim xwe nîşan bidim. Hîna li van deran e.
