Bi pêşengiya Yekîtiya Şaredariyên Herêma Enetoliya ya Başûrêrojhilat (GABB) li Salona Konferansê ya Şaredariya Yenîşehîr Komxebata Aborî, Komîn û Kooperatîf a Rêveberiyên Xwecihî hate lidarxistin. Gelek rêveberên şaredariyê û xebatkar beşdarî komxebatê bûn.
Ji Hevserokatiya GABB’ê Siraç Çelîk axaftina vekirinê ya komxebatê kir û diyar kir ku nîqaşên aborî tenê bi sernavên hilberîn, budçe û îstihdamê nayê nirxandin.
Çelîk anî ziman ku sîstema aboriyê ya heyî kedê bêqîmet dike, xwezayê texrîb dike û mekanîzmayên piştevaniyê yên civakî lewaz dike û got, bi taybetî keda jinê nayê dîtin û şêwazên xebitîna bêewle zêde bûne.
Çelîk destnîşan kir ku rêveberiyên xwecihî tenê saziyên xizmetê pêşkêş dikin nînin, ev sazî di heman demê de berpirsyar in ku piştevaniya civakî mezin bikin, rasterast tevlîbûna gel xurt bikin û polîtîkayên ku pêdiviyên xwecihî esas bigirin, ava bikin.
QADÊN HILBERANDINA KOMÎNAL
Çelîk ragihand ku xebatên rêveberiya xwecihî ya di qada aborî de, ji bo modelên alternatîf ezmûnên girîng derdixe holê û got, “Qadên hilberandina komînal, ezmûnên kooperatîfê, xebatên çandinî û xurekê, pratîkên hilberandina hevpar û torên piştevaniyê; divê nîşan bidin ku li dijî feraseta aborî ya piyasayê, modelên alternatîf ên ku pêdiviyên civakî esas digirin, pêkan in.”
EZMÛNÊN ROJAVA JÎ WÊ BÊN NÎQAŞKIRIN
Çelîk diyar kir ku armanca esas a komxebatê ew e ku ezmûnên heyî bike hevpar û navbera rêveberiyên xwecihî perspektîfeke aborî ya hîn xurttir ava bike û got, ji ezmûnên Rojava heya polîtîkayên çandinî û xurekê, ji mevzûata kooperatîfê heya modelên jiyana komînal wê gelek sernav bên nirxandin.
Piştî axaftinan, komxebat bi rûniştinên ku ji çapemeniyê re girtî, dewam kir. Tê payîn ku encamnameya komxebatê di rojên pêş de bi raya giştî re were parvekirin.
