Hevserokê Encûmena Cîbcîkar a Kantona Firatê Ferhan Hec Îsa têkildarî peymana navbera QSD û hikûmeta Şamê û rewşa Kobanê, ji ANF’ê axivî.
Ferhan Hec Îsa diyar kir ku ev demeke gelê Kobanê di nava zor û zehmetiyan de ye û got, “Hişmendiya ku tenê xwe nas dike, dixwaze pêkhateyên din qir bike. Tiştên li Kobanê diqewimin, qirkirin e. Zêdeyî nîv milyon kes ji av, xwarin, derman, kehrebe û hwd bêpar in. Her wiha ji warê xwe tên koçberkirin. Li tevahiya Kobanê talan heye.”
Ferhan Hec Îsa bal kişand ser lihevkirina navbera QSD û hikûmeta demkî ya Sûriyeyê û got, “Kobanê hîna di bin dorpêçê de ye. Tişta ku herî zêde pêdiviya me pê heye, korîdorek e û rakirina vê dorpêçê ye. Berxwedana li Kobanê, li dijî hêzên tarî berevanî ji tevahî cîhanê re kir. Ev dorpêça niha li ser Kobanê, tolhildana sala 2014’an e.”
Îsa diyar kir ku dinya tevahî li hemberî dorpêça li ser Kobanê bêdeng e û got, tenê zarokên wan ên li Ewropa û deverên din ên cîhanê rabûne ser piyan.
Ferhan Hec Îsa ragihand ku tevî ku agirbest jî hate ragihandin, hîna “hêzên hikûmeta Şamê” di gund, cih û warên wan de ne û talaniyê dikin û destnîşan kir ku ew peymana hatî ragihandin erênî dinirxînin.
Ferhan Hec Îsa got, “Sûriye bi şer bi rêk û pêk nabe, şer tenê parçebûnê çêdike. Kiryarên li hemberî Durzî, Elewî û pêkhateyên din hatin kirin, niha li hemberî Kurdan jî tên kirin. Dixwestin, navber Kurd û Ereban şer derbixin. Lê em li dijî şer in, em li welatekî ne û em ê bi hev re bijîn. Sûriye dê bi peyman û lihevkirinê jinûve were avakirin. Bi sedan şervanên me şehîd bûn. Şervanên me rû bi rûyê kiryarên herî qirêj man, serê wan hatin jêkirin.”
Hevserokê Encûmena Cîbcîkar a Kantona Firatê Ferhan Hec Îsa di dawî de ev tişt got, “Weke Rêveberiya Xweser em dixwazin bi hevdû re jiyan bikin, divê em ziman û hebûna hevdû qebûl bikin. Li ser navê Rêveberiya Xweser û gelê Kobanê ez bang li hêzên navneteweyî û dewletên garantor dikim ku ji bo rawestandina şer mudaxile bikin û vê dorpêça li ser me rakin. Sibe peyman dikeve meriyetê. Lê divê destpêkê pêdiviyên Kobanê bên bicihanîn.”
