Hevserokê Rêveberiya Xweser a Kantona Firatê Ferhan Hec Îsa têkildarî xeteriya DAÎŞ’ê ya li ser Rojhilata Navîn û bi taybet jî ya li ser herêmên Bakur û Rojhilatê Sûriyeyê û di heman demê de tevgera wan a di demên dawî de ji ANF`ê re axivî û destnîşan kir ku xetereya DAÎŞ’ê ji bo welatên Ewropayê jî derbasdar e.
Ferhan Hec Îsa di destpêka axaftina xwe de destnîşan kir ku geşedanên vê dawiyê yên Sûriyeyê rû dane ji bo DAÎŞ’ê bû zemîn ku ji şaneyên xwe bilivin û got: ‘’Êrîşa li ser herêmên Bakur û Rojhilatê Sûriyeyê tên di demên dawî de, ji DAÎŞ’ê re bû zemîn ku careke din xwe birêxistin bike. Piştî êrîşên dewleta Tirk yên li ser Bendava Tişrîn, Minbic û Pira Qereqozaxê çeteyan zirarên mezin dan gelê sivîl. Li çolistana ku ji Tebqayê dest pê dike û heta ber bi Humisê ve diçe, şaneyên DAÎŞ’ê hene ku ew ji aliyê rêjîma BAAS’ê ve nehatibûn tunekirin û heya niha hê jî ji aliyê Hikûmeta Veguhêz a Sûriyeyê ve nehatine kontrolkirin.’’
Ferhan Hec Îsa piştre diyar kir ku DAÎŞ û hikumeta nû ya Şamê ji aliyê ferasetê ve yek in û ev yek anîn ziman: ‘’DAÎŞ û Hikûmeta Veguhêz a Sûriyeyê ji aliyê ferasetê ve weke hev in, di nava xwe de tenê yekalîbûnê dipejirînin û hebûna tu neteweyên di nava xwe de qebûl nakin. Her wiha di bûyerên dawîn de li ser leşkerên hikûmeta Şamê cil û berg û alên DAÎŞ’ê hatin dîtin.’’
Hevserokê Rêveberiya Xweser a Kantona Firatê Ferhan Hec Îsa piştre ragihand ku divê koalîsyona navteweyî ji her demê zêdetir li erka xwe rabe û got: “Weke Rêveberiya Xweser, Hêzên Sûriyeya Demokratîk û Hêzên Ewlekariya Hundirîn em ê li hemberî hemû şaneyên razayî rabin da ku em herêmeke aram û dûrî terorê bidin avakirin. Niha jî DAÎŞ li bajarên weke Idlib û Efrîna dagirkirî xwe ji nû ve birêxistin dike. Divê em pêşî li vê yekê bigirin.’’
Ferhan Hec Îsa di dewama axaftina xwe de anî ziman ku Hikûmeta Veguhêz a Sûriyeyê gelek peyaman dide û bang li eşîrên Ereb dike ku li hemberî QSD`ê rabin. Lê belê bi hezaran kesên ji wan eşîran di bin fikir û felsefeya Neteweya Demokratîk ya Rêber Apo xwe birêxistin dikin, azadiya xwe di wê yekê de dîtine û got: ‘’Di encama operasyona Hesekê de bi dehan çeteyên ku xeterî bûn hatin girtin. Lê belê hikûmeta nû ya Şamê dihêle ku DAÎŞ li kêleke wan be û dihêlin ku Sûriyeyê ber bi tarîtiyê ve bibin. Ew naxazin ku Sûriyeyeke pirreng bê avakirin. Berovajî wê ew dixwazin Sûriyeyê di nava tarîtiyê de bihêlin.’’
Ferhan Hec Îsa di dawiya axaftina xwe de destnîşan kir ku ew weke Rêveberiya Xweser erka wan a exlaqî û mirovî ye ku ew projeya xwe ya çareseriyê derxînin pêş û got: ‘’Guhertina hişmendî divê bi rojane pêş bikeve û têkiliya di navbera me û hêza koalisyonê de zêdetir be. Çawa ku me beriya niha li Reqa, Minbic û Tebqayê DAÎŞ têk bir, divê hemam hesasiyet berdewam bike.’’
