Gerîlayên YJA Starê Berçem Soran û Jiyan Kobanê li ser wate û girîngiya 8’ê Adarê ji ajansa me re axivîn.
‘NASNAMEYA ME CUDA JÎ BE EM DI TÊKOŞÎNA HEVPAR DE DIGIHÊJIN HEV’
Gerîla Jiyan Kobanê anî ziman ku 8’ê Adarê rojeke girîng a nîşaneya têkoşîna jinan a li cîhanê ye û got, “8’ê Adarê di serî de li Rêber Apo li hemû jinên têkoşer pîroz be. Roja ku bi îsyana jinên li febrîqeyê hatin şewitandin derkete holê bi demê re li qada civakî bû xwedî girîngiyeke mezin. Bi saya têkoşîna bi israr a jinan îro hem ji aliyê siyasî hem jî ji aliyê sembolîk ve gelekî girîng e. Sîstema kapîtalîst jî ji bo vê rojê ji bo xwe bi kar bîne hewl da nava wê vala bike. Li hemberî vê yekê Rêberê me û xeta azadiya jinê sîstemeke azadîparêz afirandin. Rêxistina me ku bi xwedîderketina li nasnameya jinê jin bilind kir, bawerî da jinan û jinan jî bi vê baweriya ji xwe pêşengî ji civakê re kirin.”
Gerîla Jiyan Kobanê diyar kir ku jin ji netewe û nasnameyên cuda jî bin di têkoşîneke hevpar de gihîştin ev û aaftina xwe bi vî rengî dewam kir, “Em jin dibe ku ji neteweyên cuda bin, lê belê ji aliyê têkoşînê ve li ser heman rêyê ne. Ji bo vê jî divê em yekîtiya xwe xurtir bikin. Li dora manîfestoya nû ya Rêber Apo divê em bigihêjin hev. Her ku yekîtiya jinan xurt bû wê yekîtiy gelan jî pêk were Mejiyê zordar û dewletperest ê ku jinan înkar dike bi vî rengî dikare hilweşe. Ji bo pêkhatina jiyaneke azad ev têkoşîn şert e.”
‘RÊBER APO JIYANEK PÊŞKÊŞÎ ME KIR KU BÊHN ANÎ BER ME’
Gerîla Berçem Soran jî anî ziman ku 8’ê Adarê ji bo jinan rojeke têkoşînê ya girîng e û got, “8’ê Adarê bi saya berxwedana jinan îro bûye xwedî wateyeke mezin. Rêber Apo ji bo azadiya jinan têkoşîna rêxistinbûyî afirand. Jin li ser bingeha vê rêxistiniyê têkoşîneke mezin dimeşînin. Sîstema qirêj a ku li dijî jinan hate avakirin xwest bêhnê li me biçikîne, lê belê Rêber Apo jiyanek pêşkêşî me kir ku bêhn anî ber me.
Em deyndarê Rêber Apo û hevrêyên xwe yên şehîd in ku em ji vê sîstema qirêj rizgar kirin. Banga me ew e ku jin xwedî li vê rojê derkevin û berxwedanê mezin bikin. Ez hevrêyên me yên di berxwedana Rojava de destan nivîsandin, têkoşîna wan silav dikim. Têkoşîna wan têkoşîna me ye. Hêvîdar im ku 8’ê Adarê ji bo hemû jinan bibe roja piştevanî û rêxistiniyê. Bi vê wesîleyê 8’ê Adarê Roja Jinên Kedkar ên Cîhanê li jinan hemûyan pîroz be.”
