Platforma Parastina Bajêr û Piştevaniyê ya Amedê, nerazîbûnên xwe nîşanî astengkirina alîkariya mirovî ya ji Kobanê re hatiye şandin, da û bang li saziyên navneteweyî kir ku mudaxeleyê bikin.
Di daxuyaniya ku li Odeya Bazirganî û Pîşesaziyê ya Li Amedê hate dayîn de hate diyarkirin ku TIR’ên alîkariyê li sînor hatine sekinandin.
Serdar Keskîn li ser navê platformê axivî û got ku konvoya duyemîn a alîkariyê ya ji pêdiviyên sereke yên weke pakêtên hîjyen û xwarinê, betenî, mamaya zarokan, av û sotemeniyê pêk tê, di 18’ê Nîsanê de li Deriyê Sînor ê Çobabey-Kîlîsê hatiye sekinandin û destûra derbasbûna wê nayê dayîn. Serdar Keskîn da zanîn ku TIR’ên alîkariyê li depoyên aîdî AFAD’ê tên sekinandin.
Di daxuyaniyê de destwerdana avaniyên girêdayî Hikûmeta Demkî ya Sûriyeyê ya li ser alîkariyên mirovî hate rexnekirin û hate diyarkirin ku ev yek nayê qebûlkirin. Platformê diyar kir ku astengkirina alîkariyan gefan li pêşeroja gelên li herêmê dixwe.
Platformê bang li saziyên navneteweyî kir û anîn ziman ku di serî de Neteweyên Yekbûyî û Yekîtiya Ewropayê bila hemû aktor mudaxeleyê pêvajoya berbehs bikin.
Serdar Keskîn piştre ev yek anîn ziman:
‘’Ji bo ku alîkariyên mirovî bê navber, bi lez û bi awayekî ewle bigihîjin Kobanê divê demildest Deriyê Sînor ê Murşîtpinarê ku rêya herî kurt û mayînde ye, ji alîkariyan re were vekirin. Her wiha em bang li raya giştî ya navneteweyî dikin ku li hemberî rewşa berbehs berpirsiyariyan bigirin ser milên xwe. Divê alîkariyên ji bo Kabanê hatine komkirin, werin şandin.’’
