Serokê Konfederasyona Senîkayan a Skoçyayê, Mîke Arnott biryarên ku di kongreyê de hatine dayîn, nirxand. Di kongreyê de biryar hat dayîn ku têkildarî firotina çekan a Îngilistanê ji Tirkiyeyê re û û çareseriya siyasî ji pirsgirêka Kurd re, zext hem li Îngilistanê hem jî li dewleta Tirk were kirin.
Arnott anî ziman ku wan ji bo azadiya Rêberê Gelê Kurd Abdullah Ocalan û her wiha ji bo hin gav bên avêtin bang li hikûmeta Îngilîz û dewleta Tirk kirine û got: “Li gel vê yekê me bang li hikûmeta Îngilistanê kir ku li NATO’yê hewldanên dîplomatîk bide destpêkirin û firotina çekan a ji Tirkiyeyê re bide rawestandin. Her wiha me daxwaz kir ku ji bo demildest bombebaranên li ser herêmên Kurdan jî bên rawestandin, hewldan bên kirin. Biryarên sereke yên me dayîn, ev e; li Bakur û Rojhilatê Sûriyeyê êrîşên li ser herêmên Kurdan bên rawestandin û hikûmeta Îngilistanê ji bo berdana Abdullah Ocalan zextê li Tirkiyeyê bike.”
Arnott ragihand ku ew ê ji bo berdana Abdullah Ocalan nameyeke taybet ji Wezareta Karên Hundir a Îngilistan û sefaretxaneya bilind a Tirk re binivîsin û wiha got: “Di kongreyê de 300 delegeyên ku nûneriya zêdeyî nîv milyon karkeran dikin, Abdullah Ocalan ku 25 sal in dîlgirtî ye û 3 sal in ti agahî jê nayê wergirtin, rojeva me ya sereke bû. Me têkildarî nedîtina wî ya parêzer û malbatê jî nîqaş kir. Di dema encamname û dayîna biryaran de, ti delege li dijî erêkirina van biryara derneketin û me bi piştevaniya tam a hemû pêkhateyên xwe ev biryar dan.”
Arnott destnîşan kir ku Abdullah Ocalan mifteya çareseriyê jî ye û got: “Di halê hazir de em ji bo azadiya Ocalan dixebitin. Lê biryarên vê kongreya girîng wê bibe sedem ku em hîn zêdetir li ser dewletan zextên giran bikin.”
