Serokê Giştî yê Partiya Tevgera Kedê (EHP) Hakan Ozturk peyamên dawî yên Rêber Apo ji ANF’ê re nirxand.
Ozturk anî ziman ku gotina “Entegrasyona demokratîk tevlîbûna çanda Mezopotamyayê weke hebûneyeke demokratîk îfade dike” ya Rêber Apo girîng e, vê yekê bi salan tîne ziman û got, “Mebesta Ocalan a ji vê yekê ew e ku hevkariya xwişk-biratî û wekheviyê ya gelan careke din bilêv dike. Destnîşan dike ku ev hevkarî, ev hevgirtin û tevlîhevbûn divê bi rengekî demokratîk pêk were.
Gelê Kurd jî weke gelên din divê di rewşeke welê de be ku hebûna xwe hatiye qebûlkirin û dikare mafên xwe yên kolektîf bi azadî bi kar bîne. Gava ev bû, hevgirtina ku tê xwestin wê weke encameke xwezayî derkeve holê. Eger em têkiliya welatîbûna wekhev bikin bingeha têkiliya navbera gelan, encamên ku derkevin holê wê ji bo her kesî kêrhatî be.”
Ozturk ragihand ku divê gelên Tirkiyeyê ji vê pêvajoya entegrasyonê re amade bin, ji bo gavên krîtîk di vê pêvajoyê de bêne avêtin têbikoşin û axaftina xwe bi vî rengî dewam kir: “Ti carî ji destpêkê ve nayê destpêkirin. Timî hin tecrûbe hene û ev yek cihêrengiyê tevlî civakan dike. Beriya niha gelek caran pêvajoyên pêkanîna aştiyê rû dan. Ji bo careke din xera nebe divê em hîn bi baldarî nêzî hin aliyan bibin û bi vî rengî bimeşin.
Di asta heyî de ji bo derfet ji vegerê re neyê dayin, ji bo gavên şênber û krîtîk bêne avêtin divê em têbikoşin. Belê êriş û propagandayên faşîst hatin kirin, lê belê em kengî ji trena ber bi aliyê şaş ve diçin peya bibin, ew ê rast be. Girîng e em bi vî rengî nêzî rewşê bibin. Ya ku wekheviya gelan û xwişk-biratiyê pêk bîne peyabûna ji trena şaş e, çûyîna ber bi aliyê rast ve ye.”
