Meclisa Malbatên Şehîdan ji bo gerîlayê HPG’ê Azad Qendîl (Basil Kindî) yê ku 16’ê Hezîrana 2023’yan li Herêmên Parastinê yên Medyayê şehîd bûbû, merasîma seraxiyê li dar xist. Merasîm li Qada Şehîdan a Taxa Şêxmeqsûdê ya Helebê bi beşdariya endamên saziyên sivîl, partiyên siyasî, meclis û komîn û tevgerên jinan hat lidarxistin.
Piştî rêzgirtinê, ji rêveberên Meclisa Şehîd Şîlan Kobanê Aryan Cûdî axivî. Aryan Cûdî anî ziman ku dewleta Tirk a dagirker çiqasî hewl da Tevgera Azadiya Kurdistanê tune bike, lê bi ser neket û got: “Tevgera Azadiya Kurdistanê fikr e û fikr namire.”
Endamê Meclisa Olî Şêx Yehya Mehmûd jî diyar kir ku gelê li ser fikr û felsefeya Rêber Abdullah Ocalan perwerde bûye ne mimkune bi qawetê çekê têk biçe, ji ber ku îrade ji çekê mezintir e.
Ji malbata şehîd Azad Qendîl, Suheyla Elîko jî axivî û got, dê heya pêkanîna xeyalên şehîdan a avakirina welatekî azad têkoşînê bidomînin.
Di dawiyê de endama Meclisa Malbatên Şehîdan Zelûx Qenber nasnameya şehîd Azad Qendîl xwend û radestî malbata wî kir.
Merasîm bi berzkirina dirûşman bi dawî bû.
