Siyasetmedarê Kurd û şaredarê berê yê Amedê Mehdî Zana, ji ber nexweşiya KOAH’ê li Amedê rakiribûn nexweşxaneyeke taybet û li beşa lênêrîna lezgîn dihat dermankirin. Lê Mehdî Zana duh êvarê li nexweşxaneya ku lê dihat dermankirin jiyana xwe ji dest da.
Ji bo bîranîna Mehdî Zana li ber avahiya xizmetê ya sereke ya Şaredariya Bajarê Mezin a Amedê merasîma cenazeyê hat lidarxistin. Malbata Mehdî Zana, Leyla Zana û zarokên wan Ronahî Zana, Rûken Zana, Parlamenterên DEM Partiyê, siyasetmedar, Dayikên Aştiyê, rewşenbîr, endam û nûnerên saziyên sivîl yên civakî û gelek kes beşdarî bîranînê bûn. Li pêşiya avahiya şaredariyê wêneyê Mehdî Zana hate daliqandin û tabuta Mehdî Zana bi ala kesk, sor û zer û kulîlkan hat xemilandin. Li ser navê Malbatê Leyla Zana û parlamenterên DEM Partiyê sersaxiyê qebûl kirin. Bernamê ewilî bi xwendina diayan dest pê kir û piştre axaftin hatin kirin.
Hevşaredara Bajarê Mezin a Amedê Serra Bucak diyar kir ku ew ji ber dilovaniya Mehdî Zana gelek xemgîn in û wiha got: “Serê gelê Kurd û Kurdistanê sax be. Mehdî Zana hafizaya wî bajarî ye. Di wê serdemê de bûyîna serokê şaredariya vî gelî bi berdêlên mezin bû. Di derbeya 12’ê Îlonê de ji peywira xwe hat girtin û li hejmar 5 rastî êşkenceyê hat. Tevî hemû zextan jî tu carî têkiliya navbera wî û gel neqetiya. Di serdemên ku îradeya bijartiyan dihat înkar kirin de, nasname û zimanê gelê Kurd dihatin tune hesibandin re derbas bû. Li dijî vê sekinî û li ber xwe da. Ji bo ku hafizayek dîsa dubare bibe em îro li pêşiya şaredariyê bîranînê pêk tînin. Mîrasa ku wî ji me re hiştiye nîşan dide ku xwedîderketina li îrade û rûmeta gel berpirsyariyeke dîrokî ye. Serê gelê me sax be. Em ê têkoşîna wî bidomînin.”
Hevserokê Giştî yê DBP’ê Keskîn Bayindir jî bal kişand ser têkoşîna Mehdî Zana û ev tişt anî ziman: “Serê gelê me sax be. Ji bo azadiya gelê xwe, ji bo gelan têkoşîna sosyalîzm û demokrasiyê da. Kêm mirov li bajarekî şopê dihêlin. Mamoste jî yek ji wan bû. Serê gelê Amedê sax be. Em ê xwedî li têkoşîna wî derkevin.”
Rêhevalê Mehdî Zana yê zindanê Abdullah Kanat jî got, serê gelê Kurd û malbatê sax be û wiha axivî: “Ew hevalekî leheng bû, di zindanê de û di dîrokê de wisa hat zanîn. Wî di berxwedana zindanê de lehengiyeke mezin nîşan da. Di dîroka têkoşîna me de xalên werçerxînê yên girîng hene. Zindana Hejmar 5 jî yek ji van serdeman e. 50 salên têkoşînê jî salên lehengiyê ne. Hevalê Mehdî di zindanê de hevalekî şoreşger bû ku rola xwe ya pêşengiyê anî cih. Di hilbijartinên serokatiya şaredariyê de bi dengên pir mezin hat hilbijartin. Di serdema 12’ê Îlonê de rastî îşkenceyên dijwar hat. Ji ber ku hem serokê şaredariyê bû hem jî di nava berxwedanê de bû, ev bû sedem ku dijmin berê xwe bide wî. Berxwedana zindanê van rojan afirand. Pêvajoyeke nû hat destpêkirin. Şehîdên şoreşê û şehîdên aştiyê di çêbûna vê pêvajoyê de roleke girîng lîstin. Em li ber şehadeta hevalê Mehdî bi rêzdarî bejna xwe ditewînin.”
Piştî merasîmê girse ber bi Mizgefta Mezin ve meşiyan û dê saet di 13:00’an de li Mizgefta Mezin wecîbeyên olî bê kirin û piştî wê Mehdî Zana li Goristana Yenîkoyê bê definkirin.
Her wiha sersaxî dê li Mala Şînê ya Licêyiyan were qebûlkirin.
