Malbatên şehîdan, bi dehan xelkê bajarê Kobanê û gundewarê wî, nûnerên ji sazî û desteyên Rêveberiya Xweser Şehîdên Komkujiya Kobanê di salvegera 11ˊemîn de bi bîr anîn.
Di çalakiyê de Hevserokê Desteya Jîngehê ya Kobanê Arif Balî diyar kir ku komkujiya ku çeteyên DAIŞˊê beriya 11 salan kiriye piştî têkçûna wan li beramber berxwedana YPJ, YPGˊê di 2014ˊan de bû. Di wê komkujiyê de bi sedan welatî şehîd bûn.
Balî behsa komkujiyên dîtir ên li herêmê kir, weke Komkujiya Helincê di 2020ˊan de li dijî endam û rêveberên Kongra Star, Komkujiya gundê Qumcî ku di encamê de malbateke bi tevahî şehîd bûn. Balî anî ziman ku ev komkujî dikevin xana sûcên şer.
Di dewama axaftina xwe de Balî destnîşan kir ku êrişên DAIŞˊê li ser Kobanê di salên 2013, 2014 û 2015ˊan de rûbirûyî berxwedana berfireh hat ku tevahî gelê Kurd ê ji deverên Kurdistanê, YPJ, YPGˊê beşdar bûn. Ev berxwedan li dijî çeteyên DAIŞˊê xaleke werçerxê bû.
Balî anî ziman ku fedakariyên şehîdan destkeftiyên girîng li Bakur û Rojhilatê Sûriyeyê û Rojavayê Kurdistanê misoger kirin.
Çalakî bi pêxistina mûman û danîna kulîlkan li ser gorên şehîdan bi dawî bû.
Çeteyên DAIŞˊê di 25ˊê Hezîrana 2015ˊan de komkujiyeke hovane li Kobanê û gundewarê wî pêk anî. Li gorî agahiyan, di encama komkujiyê de 270 kes şehîd bûn û 233 kes jî birîndar bûn.
