Li bajarê Humsê ya ku di bin kontrola Hikûmeta Demkî ya Sûriyeyê de ye, sûcên qetilkirin û êrîşên çekdarî zêde dibin. Semîr Mehmûd (45) ê ku dema diçû taxa Hemîdî duh hatibû revandin û îro cenazeyê wî hat dîtin.
Li gorî agahiyên çavkaniyên xwecihî, li taxa Cub El Cendelî-rêya Zêdel peywendî ji welatî qut bûn û li taxa Coret Şiyah cenazeya wî hat dîtin û ji bo nexweşxaneya Weir hat veguhastin.
Berî wê bi çend saetan li taxa Ekremê komeke çekdar gule li jina ciwan Alaa Eshed (19) barandin. Di encamê de di rûyê xwe de birîndar bû.
Li gorî heman çavkaniyan, jina ciwan ji bo nexweşxaneyeke taybet hat veguhastin, lê ji ber rewşa aborî ya malê dijwar e, û lêçûna nexweşxaneya taybet zêde ye, ew ji bo Nexweşxaneya Klînîkan hat veguhastin.
Der barê rewşa wê de tu agahiyên din nehatin bidestxistin.
Ev di demekê de, ku ji ber bêaramî û tevliheviyê sûcên kuştin û revandinê li bajêr zêde bûne, bê ku tu biryarên cidî ji aliyê hikumeta veguhêz a Sûriyeyê ve werin girtin, pêk tên.
