Di demekê ku dorpêç û êrîş li ser bajarê Kobanê berdewam dikin de, jin careke din pêşengiya parastina bajêr dikin. Jinên Kobanê yên ku zarokên xwe li malê dihêlin, tax bi tax kolan bi kolan parastina bajêr dikin. Li nuqteyên parastinê yên li her kolanê hatine avakirin, jin li dijî êrîşên hovane nobetê digirin.
Di salên 2014 û 2015’an de bi saya berxwedana jinan Kobanê ji çeteyên DAÎŞ’ê hat rizgarkirin. Lê îro careke din bajarê Kobanê bi heman gefî re rû bi rû ye. Li dijî vê jin û dayikên Kobanê bi heman biryardariyê bajarê xwe diparêzin. Berxwedana li dijî êrîşê çeteyên DAÎŞ’a nûjen dîsa mezin dibe.
Zêneb Welîd, ku ew jî dayikek ji Kobanê ye sedema berxwedanê bi van gotinan rave kir, “Ez li vir im ku welatê xwe û rûmeta xwe biparêzim. Min zarokên xwe li malê hiştin û çeka xwe hilgirt. Ev çek ne ji bo êrîşê ye, ji bo parastina bajarê min e. Em ê heta dawiyê Kobanê biparêzin. Em ê nehêlin dijmin bikeve van axan.”
Zêneb Welîd, bang li hemû jinan kir û got, “Niha dem dema me ye. Wek dayik, divê em rabin ser piyan. Li ser şopa şehîdên xwe, li ser rêya Arînan bimeşin. Em ê tax bi tax li ber xwe bidin. Ger pêwîst be em ê şer bikin. Li ku derê be jî, em ê berxwedana xwe li dijî vî dijminî berfireh bikin.”
Zêneb Welîd, behsa kevneşopiya berxwedanê ya Kobanê kir û wiha dawî li gotina xwe anî, “Kobanê cihê têkçûna DAÎŞ’ê bû. Dîsa wê têk biçe. Bi hêza jinên Kurd û dayikên Kurd, ev dijmin wê li vir têk biçe. Em ê heta dawiyê li Kobanê bimînin.”
