Bi sedan şêniyên bajarê Kobanê, endamên sazî û partiyên siyasî û rêxistinên jinan şervana YPJ`ê Nûdem Ararat (Dilvîn Hiso) ku di 19`ê Çileyê li Dêrezorê, şervanên Hêzên Komandos Azad (Reşad Hesen) ku 17`ê Nîsanê li Hesekê û Çekdar Berxbotan (Îmam Hemî) ku 17`ê Çileyê li Meskenê şehîd bûbûn, îro bi merasîmeke biheybat li Pakrewangeha Şehîd Dîcle oxir kirin. Her wiha şervanê QSD`ê Dilo (Necîb Hesen) ku di 21`ê Çileyê de li Holê şehîd bûbû, hate bîranîn.
Merasîmê bi rêzgirtinê dest pê kir. Dûre endama Meclisa Malbatên Şehîdan a bajarê Kobanê Emel Behadîn sersaxî ji malbatên şehîdan re xwest û soza şopandina rêya şehîdan da. Emelê diyar kir ku ew ê şopdarên rêya şehîdên xwe bin û xewn û xeyalên şehîdên xwe pêk bînin û wiha got: “Şehîdan ji bo gel berxwedaneke bêhempa da meşandin, divê her kes jî xwedî li mîrasa şehîdên xwe derkeve û şopdarên xeta azadiyê bin. Em di her merasîmekê de soza xwe bi şehîdên xwe re nû dikin ku em ê xwîna wan li erdê nehêlin.”
Endamê Fermandariya Leşkerî ya Kobanê Kanî Ehmed jî anî ziman ku ew ê xwedî li mîrasa şehîdên xwe derkevin û wiha got: “Şehîdên me hebûn û nasnameya me ne û em hêza xwe ji şehîdên xwe digirin. Şehîdên me ji bo parastina axa xwe û gelê xwe ji êrişên dijmin canê xwe feda kir. Divê em jî şopdarên rêya şehîdên xwe bin û xewn û xeyalên wan pêk bînin.”
Piştî axaftinan, wesîqeyên şehadetê yên şehîdan hatin xwendin û radestî malbatên wan kirin. Dûre cenazeyên şehîd Nûdem Ararat, şehîd Azad û şehîd Çekdar Berxbotan hatin veşartin
Girseya gel di dawiya merasîmê de berê xwe da gundê Berxbotan ê Kobanê û sersaxî ji malbata şehîd Çekdar Berxbotan re xwest.
