Di navbera Yekitiya Ragihandina Azad (YRA) û Navend Metro ya Parastina Mafên Rojnamevanan a li Başûrê Kurdistanê de, peymana hevkariyê hat îmzekirin.
Peyman bi civînekê hat ragihandin. Civîn li avahiya YRA’yê ya li Qamişloyê pêk hat.
Hevserokên YRA’yê Evîn Xelef û Idrîs Abdulheman û serokê Navenda Metro ya Parastina Rojnamevanan Rehman Xerîb civîn li dar xist.
Di destpêka civînê de hevseroka YRA’yê Evîn Xelef bixêrhatina serokê Navenda Metro Rehman Xerîb kir. Evîn Îbrahîm Roja Şehîdên Rojava û tevahî şehîdên çapemeniyê bi bîr anî.
Peyman ji aliyê Evîn Xelef ve hat xwendin. Di peymanê de hat diyarkirin ku li ser daxwaze YRA û Navenda Metro ji bo parastina mafên rojnamegeran, pêşxistina azadiya derbirînê, li seranserî Kurdistanê hevkarî û hevrêziya di navbera rojnamegeran de, bilindkirina asta pîşeyî û parastina mafên xebatkarên ragihandinê, peymanek di navbera her du saziyan de pêk hat.
Naveroka peymana YRA û Navenda Metro wiha ye:
1. Ji bo parastina azadiya derbirînê û ya çapemeniyê, her du alî dê her dem bi hevkarî û hevrêzî xwedî helwestên hevbeş bin.
2. Pêşxistina jêhatiyên rojnamevanan bi rêya perwerde, komxebat û pevguhertina ezmûnên pîşeyî.
3. Xurtkirin û piştgiriya beşdariya li konferans û çalakiyên çapemeniyê û ji bo tevlêbûna YRA’yê nav rêxistinên rojnamegeriyê yên navneteweyî, destek were dayîn.
4. Ji bo zelalî û piştgiriya azadiya bikaranîna agahiyan, bihêzkirina mafê rojnamevanan ê xwegihandina agahiyan.
5. Pêşîgirtina li gotarên nefret, nûçeyên derew, tundiyê û bi hev re ji bo xebata xurtkirina gotareke medyayî ya profesyonal ku li gorî sincên pîşeyî xizmeta berjewendiya giştî bike, bimeşînin.
6. Navenda Metro a Parastina Mafên Rojnamevanan piştgiriya pîşeyî ji bo YRA’yê peyda bike û hewl bide çavkaniyên zêde bi hevrêziya bi aliyên pêwendîdar re, li gorî derfetên berdest dabîn bike.”
Peyman ji aliyê hevserokên YRA’yê û serokê Navenda Metro Rehman Xerîb ve hat îmzekirin.
Piştî îmzekirinê rojnamegeran pirs kirin. Li ser pirsa çima heta niha peymaneke wiha nehat çêkirin? Rehman Xerîb got: “Hîna di sala 2021’an de me civînek ji bo hevkariyê çêkir. Me nîqaş li ser çawabûna peymanê, em ê çawa bikarin destê alîkariyê bidin rojnamegerên Rojava kirin. Di encamê de piştî van nîqaşan niha em gihaştin vê peymanê.”
Piştî ku pirsên rojanemegeran hatin bersivandin civîn bi dawî bû.
