Endam û Rêveberên Meclîsa Ciwanan, Meclîsa Gel ya Mexmûrê, sazî û dezgehên civakî û gelek şêniyên wargehê tevlî meşê bûn.
Meşa ku li pêşiya Navenda Meclîsa Saziya Malbatên Şehîdan destpê kir, heya ber bi Navenda Neteweyên Yekbûyî ya Mexmûrê dom kir.
Di meşê de wêneyên Rêber Apo, Şehîd Sîpan Hiznî, pankartên “Şehîd Sîpan Rûmeta Me ye Tolhildan Soza Me ye” û “Bijî Berxwedana Rojava” hatin bilind kirin û gelek caran dirûşmeyên “Bijî Serok Apo”, “Şehîd Namirin” û “Ey Şehîd Xwîna Te Li Erdê Namîne” hat berzkirin.
Piştî ku girseya meşê gihişte vir, çalakî werguherî mîtîngê.
Piştî deqeyek rêzgirtin, Mamoste Nûdem Yaman axivî.
Nûdem Yaman di destpêka axaftina xwe de di şexsê şehîd Sîpan de hemû şehîdên şoreşê bibîr anî û behsa kesayet û têkoşîna Şehîd Sîpan kir.
Nûdem Yaman di berdewamiya axaftina xwe de got: “Bêguman di têkoşîna azadiyê de, her şehîdek ji bo me bû felsefeyeke jiyanê, ji me re bû bingehê berxwedana Rojavayê Kurdistanê.”
Nûdem Yaman bal kişand ser bûyerên dawî yên provakatîf ên ku li Rojavayê Kurdistanê rû dan û got: “Li Rojavayê Kurdistanê bi dayîna şehîdan gelek berdêlên giran hatin dayîn. Axa Rojvayê Kurdistanê bi xwîna şehîdan hatiye av dan, heya ku rizgar bibe. Şehîd Sîpan bi têkoşîn û berxwedana xwe, kêlî bi kêlî li dijî çeteyên DAÎŞ’ê 15 salan şer kir. Nehişt ku xeyal û armancên çeteyan di Kobanê de bi ser bikeve. Bêguman di pêvajoyeke wisa de ku Rêber Apo destê aşîtiyê dirêj kiriye de, êrişeke hovane li dijî şervanê Kurd bi pêş xistin. Em vê êrişê şermezar dikin û lanetê lê tînin.”
Nûdem Yaman di dawiya axaftina xwe de destnîşan kir ku ciwanên Kurd ji bo ku xwedî li şervanê xwe derbikeve bedenên xwe dan ber agir û wiha pêde çû: “Di zîndanê de xwestin îradeya wan ciwanan bişkînin. Lê çawa di zîndana Amedê de Mezlûman li hember dijmin xwe li dora armancekê xiste xelekek ji agir, wê îro jî ciwanên gelê Kurd wê heman îradeyê nîşan bidin. Ev kiryar ne li dijî pîvanên aşîtiyê ne.”
