Şêniyên Wargeha Penaberan a Şehîd Rustem Cûdî (Mexmûr) komploya navnetewî ya dijî Rêber Apo, bi meşekî girseyî şermezarkirin.
Çalakvanên greva birçîbûn û tevahî şêniyên Wargeha Mexmûrê li ber avahiya Saziya Malbatên Şehîndan kom bûn û dest bi meşê kirin. Meş heta ber avahiya NY dewam kir.
Di meşê de dovîza bi nivîsa ‘Bi şerê gelê şoreşgerî komplo têk diçe, azadiya Rêber Apo ya fîzîkî mîsoger dibe’, al û posterên Rêber Apo hatin hilgirtin û dirûşmeyên ‘Bijî Serok Apo’ û ‘Kesek Nikare Roja Me Tarî Bike’ hatin berzkirin.
Piştî ku meş gihişt ber avahiya NY, daxuyaniyek ji aliyê Hevseroka Meclîsa Gel a Mexmûrê Filîz Bûdak ve hat dayîn.
Fîlîz Bûdak di destpêka axaftinên xwe de komploya 15’ê Sibatê û hemû hêzên komploger bi tundî şermezar kir û wiha peyîvî: “Ji Şêx Seîdê Pîran bigire heta digihe şehîdên pêngava ‘Kesek Nikare Roja Me Tarî Bike’ hemû şehîdên azadiya Kurdistanê ku di oxira azadiya mirovahiyê û gerdûnî de canê xwe feda dikin, em bi rêz û minet bi bîrtînin. Em berxwedêr, filozof û zanyarê sedsalê Rêberê gelên bindest, rêhevalê jinan, Rêberê ciwanan yê ku dibêje, ‘me bi ciwantî destpêkir û em ê bi ciwantî serbikevin’ Rêber Apo silav dikin. Li hemberî hemû hêzên komploger Rêber Apo dibêje em ê roja reş vegerînin rojên azadiyê. Dîroka ku we reş nivîsandiye ku hûn dibêjin dîrok ji xwe dubarekirinê pêktê, Rêbertî dibêje na, dîrok zindiye û kêlî bi kêlî diherike ji ber wê hemû roj dikarin carek din li cewherên xwe vegere. Îro cardin bi pêngava ku Rêbertiya me avêtî re em wê kêliyê jiyan dikin.”
Piştî daxuyaniyê meş bi berzkirina dirûşmeyên ‘Kesek nikare roja me tarî bike’, ‘Bê Serok jiyan nabe’, ‘Jin Jiyan Azadî’ û ‘Ciwan fedayiyên Rêber Apo ne’ bi dawî bû.
