Lîstikvan û derhênerê navdar Yucel Erten ku nêzîkî nîv sedsalî ye di qada şanoyê de kar dike, ji ANF’ê re li ser şanoyê, demokrasiya civakî û pêvajoya aştiyê nirxandin kir.
Erten diyar kir ku dijîtalbûn nikare cihê şanoyê bigire û got ku şano hunerek e ku rasterast li ser têkiliya mirovan ava dibe.
Erten bal kişand ku hunermend ne tenê divê berheman biafirînin, her wiha divê ji bo avakirina atmosfera hunerî ya demokratîk û azad jî têbikoşin. Erten, got ku civak jî divê li hember paşveçûna demokrasiya, maf û azadiyan bêdeng nemînin. Erten, got ku di cîhana hunerê de di vê mijarê de hestiyariya ku tê xwestin kême.
‘JI BO XEBATÊN HUNERÎ Û ÇANDÎ PÊDIVÎ BI QANÛNÊN DEMOKRATÎK HEYE’
Erten anî ziman ku xebat û çalakiyên çandî û hunerî yên şaredariyan bi qanûnekê nayên parastin û got ku her tişt bi rêziknameyan tê birêvebirin. Erten, diyar kir ku rêzikname bi guherînên siyasî re bi hêsanî dikarin werin guhertin an jî betal kirin. Erten, da xuyakirin ku pêdivî bi qanûnek demokratîk û mayînde heye ku projeyên çandî û hunerî biparêze û got ku divê hunermend di vê warê de jî berpirsiyariyên xwe bicih bînin.
‘JI DEMÊN ŞER HUNER JÎ BANDOR BÛ’
Erten her wiha got ku di demên krîz û pevçûnan de gelek caran faturaya pirsgirêkan li ser hunerê tê barkirin û diyar kir ku huner ne diyariyek ji dewletê ye, belkî mafek e ku dewlet divê ji welatiyan re peyda bike.
Erten baweriya xwe bi hêza hunerê ya di avakirina empatî û diyalogê de dubare kir û got ku huner dikare mirovan nêzîkî hev bike. Ertan got, “Zanist û huner azad in, saziyên wan jî divê xweser bin. Ev jî tenê di atmosfera demokratîk de pêkan e.”
Erten li ser pêvajoya Aştî û Civaka Demokratîk jî axivî û got ku tenê rawestandina pevçûnan ji bo aştiya mayînde têr nake. Erten, bal kişand ku pirsgirêkên demokrasî, maf û hiqûqê hîn jî berdewam in û got, “Tenê dawîhatina pevçûnan nikare hemû birînan baş bike.”
‘DIVÊ DESTHILATDARÎ GAVÊN BERBIÇAV BIAVÊJE Û EM JÎ BIBÎNIN’
Erten got ku heta niha gavên ku baweriyê biafirînin ji aliyê desthilatdariyê ve nehatiye avêtin û got: “Demokratîbûn şertê bingehîn ê aştiyê ye. Ez hêj gavên ku baweriyê biafirînin nabînim.”
Di dawiyê de Erten bang li welatiyan û hunermendan kir ku pêvajoyê bi baldarî bişopînin û got, “Divê em gavên demokratîbûnê bi baldarî bişopînin û li hember her hewldana xapandinê dengê xwe bilind bikin.”
