Meclisa Sûriya Demokratîk (MSD) der barê sûca şehîdxistina şervan Sîpan û şehîdbûna girtiyên li girtîgeha Kobanê daxuyaniyek da.
MSD’ê di daxuyaniyê de wiha got:
“MSD’ê bi fikareke mezin pêşdeçûnên xeternak ên li bajarê Kobanê û hejmarek deverên Bakur û Rojhilatê Sûriyeyê li ser sûca qetilkirina şervan Sîpan (Samî Şêxmûs Hiso) dişopîne. Piştî wê sûcê xwepêşandan û bûyer derketin, bûn sedema birîndarkirina hejmarek sivîl û endamên hêzên ewlekariyê û hejmarek girtî ji ber şewatekê li hundirê girtîgehê jiyana xwe ji dest bidin. Ev şewat ji ber nerazîbûna veguhastina girtiyan bo Helebê derket.
Di heman wextê de bûyera li Kobanê qewimiye danûstandina pê re ne weke rewşeke derbasdar an jî xistina wê weke yek çîrokekê were hesibandin. Girtiyên bûne qurbanî û birîndar bûne, êrişên li dijî sivîl û endamên ewlehiyê pêwîstiya xwe bi lêpirsîneke bilez, serbixwe û zelal heye, divê berpirsên wê werin diyarkirin û her kesê destê xwe di bûyerê de heye cihê wî çi be yan jî aîdetbûna wî çi be divê were cezakirin.
MSD’ê destnîşan dike ku xwepêşandan û derbirîna hêrsê bi awayekî aştiyane mafekî rewa ye, li beramber wê êrişên li dijî sivîlan an jî endamên ewlehî yan jî mal û milkên giştî û taybet red dike. Her wiha bikaranîna hêzê li derveyî qanûnê yan jî bikaranîna desthilatê yan jî her xîtab an jî reftara şantajkirinê ku bûyerê gur bike û veguherîne aloziyeke siyasî û ewlehî red dike.
MSD’ê hişyariyê dide li ser xeteriye ku veguherîne van bûyeran bo tohmetên komî li ser bingeha neteweyî yan eşîrî yan siyasî û parvekrina çîrokên nebelgekirî beriya temamkirina lêpirsînan. Nabe Ereb an jî Kurd an jî tu pêkhateyek ji pêkhateyên civaka Sûriyeyê berpirsiyariya ferdî ji ber aîdetbûnê hilgire, her wiha nabe sûc weke rewakirina bikaranîna derveyî yasayî were bikaranîn.
Di vê pêvajoya hestiyar de, berpirsiyariya saziyên dewletê di parastina welatî, misogeriya selametiya girtiyan de, agahdarkirina malbatan li ser rewşên wan û berdana her kesê hatiye îsbatkirin sûc nekiriye zêde ye û her kesê hatiye îsbatkirin sûc kiriye ji dadweriyê re were rakirin.
Tiştê îro rû dide nabe veguhere testeke nû ya têkiliyên di navbera pêkhateyên civaka Sûriyeyê û bibe hinceta ji nû ve afirandina mentiqê alozî û çekdarî. Her wiha nabe rêveçûna entegrasyonê bi berpirsiyariya sûcê were hesibandin an jî sûc weke binkeftina vê rêveçûnê were bikaranîn. Lê bûyerên vê dawiyê piştrast dikin ku serkeftina entegrasyonê ne tenê bi rêbazên veguhestina teşkîlatan û erkên bo saziyên dewletê tê pîvandin, lê belê bi şiyana van saziyan a parastina jiyan û mafên mirovan, sepandina qanûnê bi awayekî dadperwerane û garantîkirina nepeniya herêman û welatiyên wan di nav dewleta yekgirtî ya Sûriyeyê de tê pîvandin.
Ji ber vê yekê, MSD’ê banga rawestandina rageşiyê, aramkirina kolanê, vekirina kanalên bilez ên diyalogê di nava hêzên siyasî, civakî û şêniyan de dike û banga xebata çareserkirina şopên bûyerê dûrî provakasyonê, giştîkirinê û tolhildanê dike.
Pêwîstiya pêkanîna edaletê ji bo şehîd Sîpan û tevahî qurbaniyên bûyerên Kobanê bi vekirina lêpirsîneke bilez, serbixwe û zelal heye ku hûrgiliyên qetilkirina wî û sûcên pê re werin aşkerakirin, berpirsiyar werin diyarkirin, hemû kesên tohmetên wan hatin îsbatkirin werin cezakirin, li gel wê encam ji raya giştî re werin parvekirin. Her wiha divê rêz li jiyana sivîlan û mafên wan were girtin, bikaranîna hêzê li derveyî qanûnê were redkirin, kes bê ceza nemîne. Ev jî selametiya şêniyan xurt dike, baweriya bi saziyan vedigerîne û rê li ber dubarebûna binpêkirinan digire.”
