NATO wê di 7-8’ê Tîrmehê de li Enqereyê civîneke bilind lidar bixe. Beriya civîna bilind li gelek bajarên Tirkiyeyê li dijî sosyalîstan operasyon têne kirin.
Di 7-8’ê Tîrmehê de ji ber Civîna Bilind a NATO’yê ya 36’emîn a li Enqereyê wê li seranserê bajêr gelek çalakî bêne qedexekirin, karmend bi destûr bin û hin rê li trafîkê bêne girtin. Beriya civîna bilind herî dawî walîtiya Enqereyê her cûre çalakiyên di navbera 28’ê Hezîranê û 10’ê Tîrmehê qedexe kir.
Di sibeha 23’ê Hezîranê de li Enqere û Stenbolê di serdegirtinên malan de 153 sosyalîst hatin binçavkirin.
Endamê Komîteya Navendî ya Partiya Tevgera Kedkar (EHP) Nehîr Sedîm sedema piştperdeya operasyonên beriya civîna bilind a NATO’yê ji ajansa me re nirxand.
Nehîr Sevîm anî ziman ku civîna NATO’yê ji ber bûyerên dawî li Tirkiyeyê tê lidarxistin û got, “Eşkere ye ku sedema lidarxistina civîna NATO’yê ya li Tirkiyeyê bûyerên dawî yên li herêmê ye. Armancên êrişkariya emperyalîst li Îranê negihîşt armanca xwe. Bêguman ev yek nayê wê wateyê ku DYE yan jî NATO’yê dest ji armancên xwe berdane. Lidarxistina civîna bilind li Tirkiyeyê peyama wê yekê ye ku di têkiliya desthilatdariya siyasî ya bi DYE û NATO’Yê re pirsgirêkek nîne.”
‘DESTHILATDARIYA SIYASÎ DITIRSE KU TÊKILIYA WÊ YA BI EMPERYALîZMÊ RE BÊ NÎŞANDAN’
Nehîr Sevîm bal kişand ser operasyonên dawî û anî ziman ku sosyalîst ji ber ku li ber polîtîkayên şer radibin bûn hedefa operasyonê. Nehîr Sevîm got, “NATO ji damezrandinê û vir ve nebû rêxistineke parastinê, lê bû rêvebirê şer û komkujiyên li cîhanê. Weke amûra şer a emperyalîzmê di dema dawî de jî bi heman rolê radibe.
Bêguman sosyalîstên li vî welatî ji bo teşhîrkirina vê têkiliyê û rabûna li ber planên şer, ji bo vegotina berjewendiyên gelê kedkar hewl didin. Desthilatdariya siyasî ditirse ku têkiliya wê ya bi emperyalîzmê re bê eşkerekirin. Ji ber vê yekê roj bi roj li hemberî sosyalîstan operasyonan lidar dixin. Walîtî biryarên qedexeyê yên nehiqûqî didin.”
Nehîr Sevîm diyar kir ku NATO bi êrişên li ser Îranê re bû parçeyek ji polîtîkayên emperyalîst û got, “Hîn zû ye ku mirov bibêje DYE û Îsraîl ên ku di şerê Îranê de negihîşt armanca xwe dest ji planên xwe yên li herêmê berdane yan jî wê xwe vekişînin. Bêguman wê li rêyên cuda bigerin.”
