Rêxistina Mafên Mirovan a Îranê diyar kir ku sê girtiyên Kurd ên li girtîgeha Bokanê ya li Rojhilatê Kurdistanê têne ragirtin ji aliyê rejîma Îranê ve bi cezayê darvekirinê hatin cezakirin. Li gorî vê yekê cezayê darvekirinê li Raûf Şêx Ehmedî, Mûhammed Faracî û Mûhsen Îslamgah hate birîn.
Li gorî vê yekê dadgehê bi sûcdariya “Dijminatiya li Xwedê” (muharebeh) û “Xerakariya li ser rûyê erdê” (efsad-fil-arz) cezayê darvekirinê birî.
Hate ragihandin ku Şêx Ehmedî di 26’ê Kanûna 2022’an de li Bokanê hate binçavkirin, piştre ew birin navenda îstîxbaratê ya li Ûrmiyeyê û li vê derê bi qasî pênc meh û nîvan agahî jê nehate wergirtin. Hate gotin, Mûhammed Faracî jî 11’ê Çileya 2023’an demeke kurt piştî binçavkirinê birin heman navendê.
Mûhsen Îslamgah jî ku dema hate binçavkirin 16 salî bû birin yekîneya îstîxbaratê ya li Ûrmiyeyê û 40 rojî agahî jê nehate wergirtin, piştre ew birin Girtîgeha Bokanê.
Parêzvanên mafên mirovan dibêjin, hersê girtî di binê çavan de bi êşkenceyê û zorê îfadeya wan hatiye wergirtin.
