Bi rûxandina Rêjîma Baas re hevîyên gel ên mezin hebûn ku ew sîstema hişk û yekalî bi dawî bû. Lê belê Hikûmeta Şamê ya demkî ev hêvîyên gel binpê kirin û ji kêlîyên despêkê ve ye sîyaseta xwe ya yekalî û yekreng dide ferzkirin. Gelên li Suwêdayê yek ji wan pêkhateyan e ku ev sîstem careke din qebûl nekir û dest bi rabûn û serhildanên xwe kirin. Lê dîsa jî çawa li ser Elewiyan bi nijadperestî êrîş hatin kirin û gel bi komkujiyan re rû bi rû ma, îro jî li Suwêdayê û li ser gelê Durzî heman tişt dubare dibe.
Hevseroka Nivîsgeha Rêxistinî ya Tevgara Civaka Demokratîk (TEV-DEM) Şaha Xelîl têkildarî alozîya li Sûriyeyê ji ANF’ê re axivî û destnîşan kir ku ev alozî bi salan e berdewam dikin lê belê di van demên dawîn de kûrtir bûne û got: ‘’Ji destpêka Şoreşê û heta niha Sûriye di nava rewşeke gelekî aloz de ye. Lê belê di van demên dawîn de komkujîyên ku li ser pêkhateyên li Sûriyeyê pêk tên ên weke Elewî û niha jî Durziyên li Suwêdayê, ev ne kiryar û hişmendiyên demkî ne, ji despêka Şoreşa Sûriyeyê ve û heya niha tim kuştin, revandin, girtin, êrîş û koçberkirin berdewam in. Ger em li Hikûmeta Sûriyeyê ya demkî binêrin, em ê ji destpêka Şoreşê bibînin, van komên çete ên ku êrîş, kuştin, talan û wêrankirin li ser tevahiya gelê Sûriyeyê pêk anîne ne, her wiha zihnîyeta ku didin meşandin jî bi salan e li ser perwerde bûne û di nav de mezin bûne û yekser ê ku ew perwerde dikirin û destek dida wan jî dewleta Tirk bû.”
Şaha Xelîl di berdewamiya axaftina xwe de anî ziman ku ev komkujîyên ku tên kirin ji qanûnên mirovahiyê derbas dikin û wiha axaftina xwe domand: ‘’Ev komên çete ji destpêka Şoreşê û heta roja îro ve ye li Berava Sûriyeyê û li Suwêdayê di bin navê Îslamê de van komkujîyan û van kiryarên xwe pêk tînin. Lê belê zihniyet, bûyer û komkujîyên ku ji alîyê Hikûmeta Şamê ya demkî ve îro tên kirin, ji qanûnên mirovahiyê derbas dikin. Beriya rûxandina rêjîma BAAS’ê gelê Elewî hemû ne alîgirê wê sîstemê bûn lê belê di bin navê alîgirên rêjîmê de ango tenê li ser Elewiyan komkujî li ser wan hate meşandin. Lê belê gelê Rojava ji ber ku berîya her tiştî mirovahiyê esas digire ji bo wê her bi gelê xwe yê Elewî re dilbiêş bû.’’
Şaha Xelîl piştre bal kişand li ser sîstema ku îro li Sûriyeyê tê meşandin û diyar kir ku hişmendî heman ya berê ye û got: ‘’Beriya rûxandina sîstema BAAS’ê ev kiryar li ser Kurdan dihatin meşandin lê belê ne bi heman rengî bi kuştin, revandin û destdirêjiyê bi sedan Kurd di bin êşkenceyê û zîndanên rêjîma BAAS’ê de hatin qetilkirin. Her wiha sîyaseta ku îro tê meşandin di wê demê de jî dihate meşandin. Bi rêya helandina civakê û şerê taybet bi şerekî sar civak pûç û tune dikirin. Ev tê wateya ku hişmendîya ku îro li Sûriyeyê heye, heman hişmendiya yekalî, yekrengî, yekdengî û yekolî ye. Ev rewş heta dema destpêkirina Şoreşa Rojava berdewam bû’’
Şaha Xelîl di dewama axaftina xwe de anî ziman ku kiryarên li ser Elewîyan hatin meşandin îro li ser Durziyan tê meşandin û ev yek anîn ziman: ‘’Em dibînin ku îro heman kiryarên ku li ser Elewîyan hatine kirin, îro Hikûmeta Şamê ya demkî li Suwêdayê li ser Durziyan jî dike. Eger Hikûmeta Şamê ya demkî sîyaseta xwe bi vî awayî li ser gelan berdewam bike, wê nikaribe Sûriyeyeke wekhev û ewle ku her kes bikaribe têde cih bigire, ava bike. Eger êrîşên xwe bi vê hişmendîyê dewam bikin wê rê li pêşiya xeteriyên mezin vekin.’’
Şaha Xelîl di dawîya axaftina xwe de eşkere kir ku gelê Kurd daxwaza welatekî wekhev û her kes bi rengê xwe têde cih bigire, dikin û got: ‘’Em gelên Bakur û Rojhilatê Sûriyeyê daxwaz dikin ku mîna berê dewleteke ku bi yekreng, yekol û yekdengî nebe, daxwaza me ew e ku hemû pêkhateyên li Sûriyeyê bi reng, ol û dengên xwe bi hev re bijîn. Em di proje û felsefeya xwe de vê yekê dipejrînin. Lê belê ger Hikûmeta Şamê ya demkî van kiryaran bide meşandin, ew ê rê li pêşiya xeteriyên mezin ên weke parçebûn, nakokîyên netew û olan veke û wê di encama wê de şerekî herî mezin û kûr di nava pêkhateyên Sûriyeyê bi xwe de çêbibe, ev jî wê rê li pêşiya alozîyên girantir veke.’’
