Konferansa Veguherîna Demokratîk a Komarê di Sedsala Duyemîn de, bi civîna 2’yan didome. Endamê Sekreteryaya Îmraliyê Veysî Aktaş di rûniştina sêyemîn a konferansê de mafê axaftinê girt û pêşkêşiya bi sernavê “Di çareseriya Meseleya Kurd de, Entegrasyona Demokratîk û Avakirina Jiyana Hevpar” kir.
Aktaş hêvî kir ku nîqaşên ku di konferansê de tên kirin, tevkarî di demokratîkbûna Tirkiyeyê de bike û îşaret bi xurtkirina fikra komara demokratîk kir.
Aktaş diyar kir ku “Pêvajoya Aştî û Civaka Demokratîk” dikare bibe mifteya veguherînên berbiçav û anî ziman ku pêvajo bi hewldanên aktorên siyasî yên cuda û peyamên Rêber Apo asteke nû bi dest xistiye.
Aktaş diyar kir ku veguherînên dîrokî bi gavên wêrek destpê dike û destnîşan kir ku bangên siyasî yên di Cotneha 2024’an de hatin kirin û metna ku di 27’ê Sibata 2025’an de ji bo raya giştî hate ragihandin, merheleyeke girîng a serdema nû ye.
Aktaş anî ziman ku banga çekdanînê û fesiha rêxistînî ya Rêber Apo gavekî dîrokî ye ku rê li ber siyaseta demokratîk vedike û bilêv kir ku gavên agirbest û bêçekbûnê yên piştî wê jî îradeya têkildarî pêvajoyê danî holê.
‘ENTEGRASYONA DEMOKRATÎK TÊGEHA BINGEHÎN A SERDEMA NÛ YE’
Aktaş got ku nirxanên dawî yên di Sibata 2026’an de, têgeha “derbasbûna ji aştiya negatîf ji bo aştiya pozîtîf” derketiye pêş û anî ziman ku di vê çarçoveyê de têgeha entegrasyona demokratîk girîngiyeke navendî bi dest xistiye.
Aktaş da zanîn ku entegrasyona demokratîk ne cudabûn, lê tê wateya yekbûna li ser bingeha wekheviyê û wiha got, “Yekbûna civaka demokratîk bi komara demokratîk re ye.
Entegrasyon berovajî pişaftinê ye û li dijî sepanên li dijî demokrasiyê ye. Entegrasyona demokratîk ne teslîmbûn e û ne jî asîmîlasyon e.”
PÊŞNIYARA 3 QANÛNÊN BINGEHÎN
Veysî Aktaş diyar kir ku Rêber Apo entegrasyona demokratîk li ser 3 qanûnan pênase dike û wiha dirêjî da axaftina xwe: “Qanûna civaka demokratîk ew jî xwe dispere misogeriya destûra bingehîn, qanûna azadiya hemwelatiya wekhev û qanûna rêveberiyên herêmî. Ew qanûn weke qanûnên aştiyê jî tê pênasekirin. Heke ew qanûn pêk werin li şûna çekan wê siyaset bigire. Entegrasyona demokratîk û muzakereya demokratîk lihevkirinê dixwaze. Divê em peymaneke nû ya civakî pêkbînin. Ya ku pêdiviya Tirkiyeyê jî ew e ku hemû netew bi hev re di nava wekheviyê de bijîn û tu kes ji hevdu netirse û di nava wekheviyê de bijîn. Em tu êşên hatine jiyîn ji bîr nakin lê em bi tiştên qewimîne ve jî najîn. Di vê çerçoveyê de entegrasyona demokratîk ne ji bo komeke û demkî ji bo hemû welatiyan û pêşeroja Tirkiyeyê stratejiyeke. Heke ev pêvajo pêk were dê Tirkiye bibe stêrka Rojhilata Navîn.”
