Berdevka Partiya Demokrasî û Wekheviyê ya Gelan (DEM Partî) Ayşegul Dogan li navenda giştî ya partiya xwe civîneke çapemeniyê lidar xist û li ser pêşnûme qanûna çarçoveyê axivî ku pêşkêşî Serokatiya Meclîsê hatiye kirin.
Ayşegul Dogan anî zima ku DEM Partî cara yekê ye ku mohra xwe datîne binê pêşnûme qanûnekê û got, “Ji bo paşeroja me ya hevpar, ji bo jiyaneke demokratîk a li Tirkiyeyê îmzeyên destpêkê hatin avêtin. Xwedî girîngî û qîmeteke bi vî rengî ye.”
Ayşegul Dogan diyar kir ku pêşnûme qanûn weke gava destpêkê bû ku ji zemîna şer derbasî ser zemîna siyaseta demokratîk û hiqûqê dibe û got, “Deriyê destpêkê yê pêvajoyeke hiqûqî û siyasî hate vekirin ku bi rojekê yan jî demekê sînorkirî nîne. Piştî şerê bi dehan salan rêya ber bi aştiyê ve bivê nevê wê qonax bi qonax be. Di demên bi vî rengî de gavên bêne avêtin divê ne gelekî bêne nepixandin ne jî bêne pûçkirin, ne jinedîtî ve bên ne jî ji ber kêmasiyên xwe bêqîmet bê kirin. Bêguman em ê kêmasiyên wê bibêjin û rexne bikin. Em ê bi rêya pêşniyarên xwe hewl bidin pêvajoyê xurt bikin. Partiya me têkoşîna aştî û demokrasiyê bênavber bi berdêlên giran bi salan e dewam dike. Lewma em ê bi biryardariyeke siyasî ya damezrîner ku derfetên heyî dibîne, bi berpirsyariyê radibe û her gavê dike gava destpêkê ya piştî wê, em ê vê têkoşînê bi dewamî bimeşînin.”
Berdevka DEM Partiyê Ayşegul Dogan bi lêv kir ku qanûna çarçoveyê destpêkeke girîng e û wiha got: “Ew qanûn ji bo 86 milyonan pir girîng bû. Ew îmza ji bo pêşeroja me xwedî wate bû. Em jî dibêjin ji bo kesên ji bo jiyaneke hevpar têdikoşin, bi xêr be. Em hemû kesên berdelên mezin danê bi rêzdarî bi bîr tînin. Em dest bi serdemeke dîrokî dikin. Di sedsala 2’yemîn a komarê de em di pêvajoyeke ku bi hev re avakirinê de ne. Divê em têkoşîna hevpar mezintir bikin. Bi vê qanûnê deriyê aştî û demokrasiyê û avakirinê hat vekirin. Helbet kemasiyên wê hene. Lê ji bo derfetên erênî destpêkek e. Ew qanûn helbet pirsgirêka Kurd çareser nake, ew giredayî têkoşîna me ye, lê deriyekî vedike.”
Ayşegul Dogan destnîşan kir ku divê têkoşîna aştî û demokrasiyê bê mezinkirin û wiha pê de çû: “Ew qanûn di encama muzakere û hevdîtinên demdirêj de pêkhat. Em hemû kesên piştgiriya vê qanûnê dikin re spas dikin. Ew qanûn ji bo vegera welat jî deriyekî vedike. Cara yekem pirsgirêk bi qanûnan tê destgirtin. Me jî pêşniyar kiribû ku ji bo şopandinê deste werin avakirin. Di qanûnê de pêşbîniya desteyan jî girîng bû. Avakirina desteyek li meclise pir girîng e. Ew berpirsyariya hemû partiyên siyasî ye. Bi dawîbûna serdema çekan, demokratîkbûyinê hewce dike. Derfeta ji bo mafê zimanê dayikê, mafê xweîfadekirinê zemîneke demokratîk vedike.”
Di dewama axaftina xwe de Ayşegul Dogan peyama Rêber APo a ‘Dikare bibe mifteyek’ bi bîr xist û wiha axivî: “Birêz Ocalan aktorê sereke yê vê pêvajoyê ye. Divê birêz Ocalan karibe di koordînasyonê de cih bigire û şert û mercên wî jî li gor vê bên sererastkirin. ji bo pêşvêçûna pêvajoyê û ji holê rabûna xetereyan ew yek pir girîng e. Divê em hemû bi hev re şert û mercên aştiyê ava bikin. Em qala pêşerojeke hevpar dikin. Divê em vê derfetê baş bikarbînin. Em bi vê cidiyetê nêz dibin û divê hemû kes jî li gor vê cidiyete nêz bibin. Deriyek nû vedibe, divê em bi hev re di vî derî de derbas bibin. Divê em dev jî zimanê dijber û dijmantiyê berdin û zimanekî aştiyanê bi kar bînin. Di serî de desthilat û hemû partî jî zimanekî aştiyanê bi kar bînin.”
