Li dijî dorpêça li ser Kobanê ya ji aliyê komên girêdayî hikûmeta demkî ya Sûriyeyê HTŞ’ê ku ji aliyê Tirkiyeyê ve tê destekkirin, komek ciwan bi pêşengiya Însiyatîfa Karwana Gelan hatine Tirkiyeyê û tevî astengiyên polîsan jî li Pirsûsê daxuyaniyek dan. Yek ji ciwanan Caro Sommer têkildarê mijarê ji ANFê re axivî.
HIŞMENDIYA KU BI KAMPANYAYA ‘JIN ROJAVA DIPARÊZIN’ RE PÊŞKET
Caro Sommer a ku ji bajarê Leipzig a Elmanya hatiye, got ku pêvajoya wê ya siyasîbûnê di komên dijî faşîzmê de dest pê kiriye, lê di van avahiyan de pirsgirêkên jinan têra xwe nehatine dîtin. Caro Sommer, diyar kir ku bi beşdarbûna di kampanyaya “Jin Rojava Diparêzin” de ew ji nêz ve pirsgirêka Kurd û têkoşîna jinan nas kiriye û got ku rola pêşeng a jinan li Rojava di wê de hişmendiyek xurt çêkiriye. Caro Sommer, anî ziman ku pergala serdestiya mêran, mêran jî dixe nav qaliban, lê ev rewş têra xwe nayê pirsîn.
‘LI EWROPAYÊ TEVGERÊN ENTERNASYONALÎST HÎN GIRÎNGIYA ROJAVA FÊM NEKIRINE’
Caro Sommer, destnîşan kir ku modela Rojava di demekê de ku faşîzm li cîhanê zêde dibe weke alternatîfek girîng pêş dikeve û got ku tevgerên enternasyonalîst li Ewropayê ji vê yekê haydar nînin. Caro Sommer, diyar kir ku modela Rojava li Ewropayê bi têra xwe nayê zanîn û medyayê jî di vî warî de bi bandor e. Caro Sommer, anî ziman ku kanala El Cezîre li Ewropa gelek tê şopandin û got ku di vê pêvajoyê de ev kanal aliyê HTŞ’ê girtiye û êrîşên li ser Rojava rewa kiriye. Caro Sommer, destnîşan kir ku armanca wan ne tenê hevgirtin e, lê di heman demê de ji ciwanên li Ewropayê re ravekirina modela civaka wekhevîxwaz, piralî û ekolojîk e ku di bin pêşengiya jinan de hatiye damezrandin.
BERTEKA GEL A LI DIJÎ DORPÊÇÊ
Caro Sommer, anî ziman ku ev helwestek durû ye ku dewletên Rojavayî di şerê li dijî DAÎŞ’ê de piştgiriyê bidin Kurdan, lê îro di demek ku statuya wan dikeve xeterî ew bi tenê bihêlin. Caro Sommer, diyar kir ku hêzên emperyalîst li gorî berjewendiyên xwe tevdigerin û got ku faktora diyarker a rastîn berteka gel e. Caro Sommer, destnîşan kir ku Rojava alternatîfek ji bo pergala kapîtalîst û yekparêz pêşkêş dike û got ku wan dest bi hişyarkirina ciwanan li Ewropayê li ser vê modelê kiriye.
