Cenazeyê Şervana Hêza Jinan a Ermen-Tabûra Şehîd Nûbar Ozanyan şehî Talar (Nesrîn Şukrî) ku 8’ê Nîsanê dema erka xwe bi cih dianî li Hesekê di encama qezayê de şehîd bû, îro bi merasîmekê li Pakrewangeha Şehîd Rustem Cûdî ya gundê Berkevirê yê Dirbêsiyê hat veşartin.
Bi sedan şêniyên bajarê Dirbêsiyê û koçberên Serêkaniyê, endamên saziyên sivîl, meclis, şervanên hêzên leşkerî û Asayîşê beşdarî merasîmê bûn.
Merasîmê bi rêzgirtinê dest pê kir. Piştre rêvebera Meclisa Malbatên Şehîdan a Serêkaniyê Bedriya Îbrahîm axivî û soza domandina rêya şehîdan û bicihanîna hêviyên wan da.
Ji fermandarên Tabûra Şehîd Nûbar Ozanyan Sûzî Serkîs jî axivî û diyar kir ku jin ji bo azadî û rûmetê têkoşînê dikin û şehîd Talar jî di vê rêyê de canê xwe feda kir.
Piştî axaftinan wesîqeya şehîd Talar hat xwendin û radestî malbata wê hat kirin. Cenazeyê şehîd Talar bi dirûşman hate veşartin.
