Roja yekemîn a Konferansa “Di Sedsaliya Duyemîn de Veguherîne Komara Demokratîk” a ku li Stenbolê tê lidarxistin, bi rûniştina forumê ya bi sernavê ‘Komara kî, Pêşerojeke Çawa?’ dewam kir.
Nuray Turkmen moderatoriya rûniştinê û Îrfan Çagatay, Alî Duran, Huda Kaya, Levent Ayaşlioglu û Îhsan Elîaçik wekî axaftvan tevlî bûn.
‘DIVÊ KOMAR BIBE YA KESÊN LI QERAXÊ JÎ’
Ewilî Îrfan Çagatay li ser mijara “Di Qeraxa Komarê de: Tecrubeya Lazan û Hemwelatîbûna Demokratîk” axivî. Çagatay anî ziman ku di tevahiya dîroka Komarê de Laz ji nedîtî ve hatine û anî ziman ku divê li ser bingeha hemwelatîbûna demokratîk nêzîkatiyeke nû were pêşxistin.
Çagatay diyar kir ku zimanê Lazî di salên dawî de pir paşketiye û wiha got, “Komar ne tenê ya kesên navendê, divê ya kesên li qerexê jî be. Xurtkirina gelan, azadiya civakê tîne.”
‘BENDEWARÎ NEHATIN PÊŞWAZÎKIRIN’
Alî Duran Topuz jî li ser mijara “Resterasyona Hegemonîk li dijî Hêviya Demokratîk” axivî û pêvajoya ku têkildarî çareseriya pirsgirêka Kurd tê meşandin, nirxand.
Topuz anî ziman ku bendewariyên demokratîkbûnê û hiqûqê ku di destpêka pêvajoyê de hate ziman, nehatine pêşwazîkirin û anî ziman ku hêviyên ku di qonaxa yekemîn de çêbûn, bi demê re qels bû.
‘KOMAREKÎ KU JIN DAMEZRÎNER BIN’
Huda Kaya li ser mijara “Ji Dîroka Zilmê heta Ahenga Kozmîk” axivî û anî ziman ku bêyî edalet û heqîqetê aştiya mayînde ne pêkan e.
Huda Kaya got, “Bêyî edalet aştî nabe. Bêyî wîjdan ne edalet, ne jî aştî dibe. Ger êşên di civakekî de neyên axaftin, xwe gihandina heqîqetê çênabe. Êşa ne xuya, nayê girtin. Lê heqîqet jî bi tena serê xwe têre nake. Ji ber ku mirov tenê naxwazin werin bihîstin, dixwazin ku tiştên ku ew jiyan kirine werin qebûlkirin. Aştî ne tenê bêdengkirina çekan e, di heman demê de komarekî bi rûmet e. Divê komarekî demokratîk, çêker û jin lê damezrîner in, pêk were.”
PENABERÎ Û SIYASETA MAF HATE NÎQAŞKIRIN
Levent Ayaşlioglu li ser mijara “Ji Cihê xwe Bûyîn, Bi hev re Jiyankirin: Penaberî û Siyaseta Maf” axivî û diyar kir ku diyardeya penaberiyê girêdayî krîzên ku pergala kapîtalîst diafirînê ye.
Ayaşlioglu anî ziman ku penaber di nava jiyana civakî de tên wêderkirin û bilêv kir ku ji bo avakirina jiyaneke layiqê rûmeta mirovahiyê divê siyasetekî li ser bingeha edaleta cviakî û maf were pêşxistin.
Herî dawî Îhsan Elîaçik jî li ser mijara, “Ji Peymana Medîne Heta Komara Demokratîk, Jiyana Hevpar Pêkan e?” axivî û diyar kir ku Peymana Medîneyê dikare di nîqaşên li ser komara demokratîk de bibe referansekî girîng.
Piştî rûniştina forumê, roja yekemîn a konferansê bi dawî bû.
