Şandeya ku ji Hevserokê Meclisa Gel a Wargeha Penaberan ya Şehîd Rûstem Cûdî (Mexmûr) Ehmed Şehbaz, Hevşaredar Edban Yilmaz û Hevberdevkê Komîteya Têkiliyên Derve Bêwar Emîn pêk dihat ku ji bo çareserkirina pirsgirêkên wargehê di 14’ê Gulanê (2025) de serdana Bexdayê kiribûn, piştî ku hevdîtin bi Wezîrê Edaletê re pek tînin, di vegerê de hatibûn binçavkirin.
Xelkê wargehê li dijî rêgirî, ambargo û dorpêçê gelek caran meşiyan û daxwaza mafê xwe kirin. Di encama berxwedana xelkê Mexmûrê de, piştî 37 rojan nûnerên wargehê hatin berdan.
Wargeha Mexmûrê piştî dorpêça PDK’ê, vê carê bi dorpêçek Iraqê re rû bi rû ye. Iraq ji 10’ê Nîsanê ve rê nade kel û pel bikevin nava wargehê, rê nade karker biçin ser karên xwe û nasnameyên xelkê wargehê nû nakin.
Her wiha ambargoya PDK’ê ya li ser wargehê jî hîn dewam dike, di 17 Tîrmeha 2019’an de Rêveberiya PDK’ê ambargo danî ser wargehê û rê neda ku tu kes ji wargehê biçe Hewlêrê. Ji wê rojê ve PDK jî rê nade xelkê wargehê derbasî bajarên Başûrê Kurdistanê bibe. Ev ambargo û rêgirî di dema dawî de bandorek xirab li jiyana xelkê wargehê dike û ev bandora nerênî roj bi roj zêdetir dibe.
