Li Sinûnê bi pêşengiya ‘Hevpeymaniya Doza Êzidiyan’ û tevlîbûneke xurt a hemû Komînên Komelgehan ên ser bi Meclîsa Gel a Şengalê û TAJÊ, meşeke girseyî hate lidarxistin.
Her wiha gelek kesayetên Êzidî, rûsipî, siyasetmedar, çalakvan, nûnerên saziyên sivîl, rojnamevan û xelkê herêmê jî beşdarê çalakiyê bûn.
Di çalakiyê de dirûşmeyên; ‘‘Şengal a Şengaliyane’, ‘Em îdareya ferzkirî qebûl nakin, bila hikûmet rêz li vîna gel bigire’ hatin gotin.
Li ser navê komîteya amadekar, endamê Hevpeymaniyê Tamir Nayîf Xelef daxuyanî xwend.
Di daxuyaniyê de hate destnîşankirin ku ev îdareya ku niha hewl tê dayîn were vegerandin, îdareyeke rewatiya xwe winda kiriye û tenê nûnertiya berjewendiyên partiyekê dike.
Xalên girîng ên daxuyaniyê wiha ne
– Em hewildanên vegerandina îdareya kevin a ser bi PDK’ê bi tundî red dikin. Ev îdare ne li gorî qanûnên dewleta Iraqê, lê li ser bingeha siyaseta hizbî hatibû avakirin.
– Ji ber ku PDK’ê û hevkarên wê di Meclîsa Parêzgeha Neynowayê de astengî derxistin, heta niha îdareyeke serbixwe nehatiye avakirin. Ev yek bûye sedem ku projeyên xizmetguzariyê û avadankirinê rawestin.
– Ev îdareya ku îro dixwaze vegere, di sala 2017’an de Şengal bi tenê hişt û li Hewlêrê bi cih bû. Di dema ku gelê me di nav kavilan de hewl dida vegere ser axa xwe, wan ji dûr ve tenê li daxwazên partiya xwe mêze dikir.
– Hafizeya Şengalê nayê jêbirin. Gelê me fermanên 3’yê Tebaxa 2014’an ji bîr nekiriye. Ew îstîsmar û binpêkirinên ku di bin sîbera wê îdareyê de pêk hatin, sedema sereke ya bêbaweriya me ye.
– Em vegera îdareya kevin (hikûmî) a li Şengal û Sinûnê bi temamî red dikin.
– Divê Hikûmeta Navendî û ya Neynowayê rêzê li vîna gelê Şengalê bigirin û dawî li peymanên siyasî yên li ser pişta gel bînin.
– Divê zûtirîn dem îdareyeke nû, serbixwe û jêhatî ji kesên li hundirê Şengalê dijîn were avakirin.
– Divê dosyaya budceya Şengalê ya ji sala 2011’an û vir ve were vekirin û were pirsîn ka ew pere li ku derê hatine xerckirin.
– Berpirsiyariya her alozî û nerazîbûneke gel dikeve stuyê wan aliyên ku dixwazin îdareyeke ferzkirî li ser gel bidin, qebûlkirin.”
Piştî xwendina daxuyaniyê, girseya gel bi berzkirina dirûşman ber bi Çerxerêya Şehîd Mam Zekî Şengalî ve meşiya.
