Heyva Sor a Kurd ji ber êriş û komkujiyên ku çeteyên hikumeta demkî li taxên Şêxmeqsûd, Eşrefiyê û Benî Zêd ên Helebê kirine ku di encamê de gelek kes birîndar û şehîd bûn, daxuyaniyek da.
Daxuyanî li ber avahiya Heyva Sor a Kurd a li bajarê Hesekê bi amadebûna endamên Heyva Sor a Kurd ve hat dayîn. Hevserokên Heyva Sor a Kurd a Herêma Bakur û Rojhilatê Sûriyeyê Hediye Abullah û Dilgeş Îsa daxuyanî xwend.
Di daxuyaniyê de hate gotin, ji ber hedefkirina malên sivîlan û saziyên binghîn ên xizmetguzariyê rewşa taxên ku ev ji zêdetirî 5 meh e dorpêçkirî ne, karesetdar e, nemaze ku pêdiviyên bingehîn bi taybetî li nexweşxane û navendên tenduristiyê nemane.
Di daxuyaniyê de îşaret pê hat kirin ku komên êrişkar heya niha nahêle tu aliyên bijîşkî an mirovî ji bo rakirina birîndaran derbasî taxan bibin û êrişên xwe didomînin û hate gotin: “Ev yek binpêkirina mafên mirovan û qanûnên navneteweyî ne.”
Heyva Sor a Kurd di dawiyê de bang li hemû aliyên navneteweyî û xwecih ên têkildar kir ku berpirsyariyên xwe yên exlaqî û mirovî bi cih bînin, ji bo rawestandina êrişên li dijî sivîlan bikevin tevgerê, kerîdorên mirovî yên ewle vekin. Her wiha ragihand ku eger kerîdorên mirovî werin vekirin ew amade ye derbasî taxan bidin da ku birîndaran rakin û alîkariyên mirovî derbas bikin.
Piştî xwendina daxuyaniyê, Hevya Sor a Kurd 15 kamyonên alîkariyê ber bi Helebê ve bi rê kirin.
