Li gorî daneyên Rojnewsê, di nava meha derbasbûyî de jinek hate kuştin, 4 jin bi gumanbarî mirin û 2 jin jî birîndar bûn.
Li gorî vê yekê bûyerên meha derbasbûyî bi vî rengî ne:
Di 1’ê Çileya îsal de li bajarokê Kelar a navenda îdareya Germiyan, 2 xwişk di mala xwe de ji ber gazê yek jiyana xwe ji dest da û ya din jî birîndar bû.
Roja 3’yê Çileyê li parêzgeha Silêmaniyê jinek di encama buyerek bi guman de ji ber şewatê jiyana xwe ji dest da.
4’ê Çileyê li parêzgeha Kerkûkê cenazeyê jinekê di nav bendava Xase hate dîtin ku bi betaniyekê hatibû pêçan û blokek bi cenazeve hatibû girêdan ku bin av bibe.
Roja 6’ê Çileyê li bajarokê Quştepe ya ser bi parêzgeha Hewlêrê jinek Ereb bi şêweyek guman jiyana xwe ji dest da.
Her wiha 7’ê Çileyê li parêzgeha Dihokê keçek 14 salî bi navê Înas Îsa piştî gefên rêveberê dibistana xwe di encama şewatek guman de jiyana xwe ji dest da.
Di 24’ê Çileyê de li parêzgeha Kerkûkê jinek bi navê ‘H-Y’ (38) û xwediya 3 zarokan, ji aliyê hevjînê xwe ve rastî êrişa bi tîzabê hat û bi awayekî giran birîndar bû.
Li gorî bîlançoyan, di sala borî de li Başûrê Kurdistanê 51 jin hatin qetilkirin yan jî bi şêweyek guman jiyana xwe ji dest dan.
