Li Belçîkayê bi armanca nasandina çand û hunera Kurdî, her sal festîvala rengûreng tê lidarxistin. Îsal jî festîval li Brukselê destpê kir.
Di destpêka festîvalê de bi cil û bergên Kurdî li kolanan meş hate kirin. Meş bi davul û zurnayan hate lidarxistin, jin bi defên xwe beşdar bûn. Kurd bi cil û bergên xwe yên herêmî beşdarî meşê bûn û di meşê de posterekî mezin ê Rêber Apo hate hildan. Meş li kolanên Brukselê nêzî nîv saetê dom kir. Meşê bala kesên biyanî jî kişand.
Piştî ku kortej gihişt qada festîvalê deqeyek rêz hate girtin. Piştre hevserokên NAV-BEL’ê axivîn. Di axaftinan de bal kişandin ser girîngiya nasandina çand û hunera Kurdî û bangeke xurt a tevlîbûnê hate kirin.
Li ser navê Saziya Çand û Hunerê ya Kurd a Ewropayê Sînan Gever jî axivî û destnîşan kir ku çalakiyên li ser çand-hunerê eleqeyeke zêde dibînin û ev yek ji bo gelê Kurd li çanda xwe vegere, firsendek girîng e. Gever bal kişand ser xeteriyên ku çanda Kurdî pê re rû bi rû ye û got, “Em dikarin bi xwedî derketina li çanda xwe, pêvajoya ku Rêber Apo dayî destpêkirin hîn pêşdetir bibin.”
Festîvala ku her sal tê lidarxistin, îsal wê heya 24’ê Tebaxê bidome. Konser, folklor, defîleya cil û bergên Kurdî û xwarinên herêmî jî wê bên pêşkêşkirin.
Hunermendê Kurd Amele jî li qada festîvalê bû.
Festîval wê li qada Place d’Espagne ya li navenda Brukselê, her roj piştî nîvro destpê bike û heya saet 20.00’ê bidome.
