Li gorî medyaya DYE û ya herêma Kurdistanê, Wezareta Edaletê ya DYE, ji bo destserkirina qesra kurê serokê PDK’ê Mensûr Barzanî, ya li devera Beverly Hills gilînameyeke qanûnî hatiye tomarkirin.
Li gorî dozê di navbera salên 2016 û 2020’an de, şîrketek Emerîkî ji bo gihandina sotemeniya balafiran ji bo artêşa welatê xwe ya li Balafirgeha Hewlêrê, li gel kurê serokê PDK’ê Mesûd Barzanî, Mensûr Barzanî, li hev kiriye.
Tê gotin ku ji bo her lîtreyek sotemeniyê (0.25 dolar) wek bertîl dane Mensûr Barzanî, da ku ew jî di beramber de rê li ber kompanyayên hevrik bigire û wan dûr bixe.
Agahiyên rojnamevaniyê, bal kişandine ser wê yekê ku di dema şerê li dijî DAÎŞ’ê de, ew kompanya ji ber vê peymana gumanbar zêdetirî 700 mîlyon dolar ji Ajansa Lojîstîk a Parastinê ya DYE (DLA) wergirtiye.
Di dozê de, tê gotin ku ajans neçar maye sotemeniyê bi bihayekî pir zêde ji wê kompanyayê bikire, ji ber ku rê li ber kompanyayên din hatiye girtin ku bikevin balafirgeha Hewlêrê.
Wezareta Edaletê ya DYE, eşkere kir ku ew pereyên wek bertîl dane Mensûr Barzanî, derbasî hesabekî darayî yê bi navê ‘NYJD Trust No.1’ hatine kirin ku li Virginia ji bo Mensûr Barzanî hatiye avakirin.
Di sala 2018’an de, 30 mîlyon dolar ji wî pereyî ji bo kirîna qesreke bedewa li Beverly Hills û nûjenkirina wê hatiye bikaranîn. Ev yek li gorî qanûnên DYE weke ‘diravê nepaqij’ tê hesibandin.
Her li gorî nûçeyên hatine weşandin, ev dosye ji aliyê Buroya Lêkolînê ya Federal (FBI), Dezgeha Lêkolîna Sûcên Parastinê û Beşa Bacê (IRS) ve bi hûrgulî hatiye lêkolînkirin.
