Gele Kobanê bi beşdariya bi sedan kesan, şervanê Hêzên Komando Mihemed El Elî, şervanê Hêzên Rizgariya Efrînê Wesîm (Xesan Diyab) û endamê TEV-DEM’ê Îsmaîl Mislim ber bi rêwîtiya wan a dawî ve oxir kirin. Di merasîmê de her wiha endamê TEV-DEM’ê Memduh Şêx Elî jî hat bibîranîn. Merasîm bi beşdariya nûnerên saziyên Rêveberiya Xweser, partiyên siyasî û rêxistinên jinan li Goristana Şehîd Dicle hat lidarxistin.
Di merasîma ku ji bo Mihemed El Elî yê ku 18’ê Rêbendanê li Hesekê şehîd bû, Wesîm (Xesan Diyab, yê ku di heman dîrokê de li Reqqayê şehîd bû û Îsmaîl Mislim yê ku li ser rêya Ebyed/Spî jiyana xwe ji dest dabû merasîma ku hatibû organîzekirin de, Memduh Şêx Elî yê ku 20’ê Rêbendanê li Kobanê wefat kiribû jî hat bibîranîn.
Merasîm bi deqeyeke rêzgirtinê dest pê kir. Li ser navê Meclisa Malbatên Şehîdan a Kobanê Emel Behadîn axivî; sersaxî ji malbatên şehîdan re xwest û diyar kir ku ew ê têkoşîna şehîdan bidomînin. Behadîn destnîşan kir ku şehîdan ji bo gelê xwe berxwedaneke mezin nîşan dane û got: Em ê xwîna şehîdên xwe li erdê nehêlin, em ê xewnên wan pêk bînin. Di axaftinan de hat destnîşankirin ku mafên gelê Kurd dê bêne parastin û têkoşîn bi hêza ku ji şehîdan tê girtin, dê berdewam bike.
Li ser navê Fermandariya Meclisa Leşkerî ya Kobanê Mehmûd Dêmo jî sersaxî ji malbatên her çar şehîdan re xwest û diyar kir ku ew ê xwedî li mîrasa şehîdan derkevin. Dêmo got, “Em Kurd in, em hene û em ê her dem hebin” û anî ziman ku ji bo gel bigihîje mafên xwe û armancên şehîdan pêk werin, ew ê têkoşîna xwe bimeşînin.
Di çarçoveya merasîmê de nasnameyên şehîdan hatin xwendin û radestî malbatên wan hatin kirin. Di dawiya bernameyê de cenazeyên Mihemed El Elî, Wesîm û Îsmaîl Mislim bi dirûşmeyên “Şehîd namirin” hatin veşartin.
