Navenda Ragihandina Hêzên Sûriya Demokratîk (QSD) bi daxuyaniyekê mikurhatinên xeternak ên serçeteyekî çeteyên DAÎŞˊê ku demeke berê ya vê mehê hatibû girtin, parve kirin.
Di daxuyaniyê de hat diyarkirin ku di 7ˊê Kanûnê de Tîmên Operasyonên Leşkerî (TOL) ên girêdayî QSDˊê operasyoneke ewlehiyê li Dêrazorê li dar xist. Di operasyonê de çeteyê bi navê Sahir Ehmed El Xelef El Ebdullah ku yek ji xetertirîn serçeteyê şaneyên DAÎŞˊê û berpirsê veguhastina çek, cebilxane û mayînan e hat girtin. Li mala serçete jî mîqdarek çek hatin dîtin û desteserkirin.
Di daxuyaniyê de hat destnîşankirin ku serçete di lêpirsînan de li xwe mikur hat ku tev li gelek êrişan bûye, li kêlek wê jî planên çeteyan ên li herêmê aşkera kirin.
Li gorî daxuyaniyê, serçete dibêje ew ji bajarokê Hewayic Bom Mesa yê rojhilatê gundewarê Dêrazorê ye, beriya 2 salan tevlî çeteyên DAÎŞˊê bûye, gelek êrîş li dijî QSDˊê kirine. Serçete diyar kir ku ew beşdarî nêzî 20 êrîşên li dijî QSDˊê û Hêzên Ewlekariya Hundirîn bûye.
Serçete anî ziman ku wan êrîşî biriye malekê ku red kiriye “zekatê” bide û êrîşî tankera sotemeniyê jî kiriye.
Serçete destnîşan kir ku wan di êrîşan de ji bo cihê wan aşkera nebin telefon bi xwe re ranekirine, her êrîşek belge dikirin û ji berpirs re dişandin ku pereyan bidin wan.
Serçete anî ziman ku civînên wan li bajarên mezin weke Dêrazorê dihatin lidarxistin, hin kes hebûn ku planên armanc û demên wan dikirin. Wî bi rêya bernameyên medyaya dîjîtal têkilî bi berpirsê şaneyê re datanî û di aliyê meydanî de bi kesê navê xwe “Ebû Elî Muhîb” re dida û distand.
Di daxuyaniyê de hat gotin ku serçete li xwe mikur hat ku ew berpirsê depokirina çek, cebilxane û mayînan di hundirê mala xwe de bû. Serçete da zanîn ku çeteyên dîtir ên di şaneyê de ji aliyê rojavayê çemê Firatê ve bi sîfetên sivîl bêyî rakirina belge û çekan derbas vî alî dibûn, têkilî bi wî re datanîn, wî jî çek û teqemenî bi rêya motorsiklêtan an jî bi veşartina di nava sebzeyan an jî çekan de digihand wan.
QSDˊê di dawiya daxuyaniya xwe de diyar kir ku ev mikurhatin bi awayekî zelal îsbat dikin ku tu çeteyek di nava DAÎŞˊê de ji destê edaletê nafilite û hêzên wan dê bêbandorkirina şaneyên terorîst û ziwakirina çavkaniyên piştgirên wan ji bo parastina ewlehiya sivîlan û aramiya herêmê, bidomînin.
