Li gorî agahiyan Hevserokên Giştî yên Partiya Demokrasî û Wekheviyê ya Gelan (DEM Partî) Tulay Hatîmogûllari û Tûncer Bakirhan, Serokwekîlên Koma DEM Partiyê, Rêveberiya Komê, Amîrê Îdareya Komê, Berdevka Partiyê, Berdevka Meclîsa Jinan, endamên Heyeta Îmraliyê, endamên Komîsyona Edaletê ya Meclîsê, endamên Komîsyona Demokrasî, Xwişk-Biratî û Piştevaniya Mîllî pêşnûme qanûna bi sernavê “Xurtkirina Yekbûna Civakî û Piştevaniya Mîllî” îmze kirin.
Piştî civîna îmzekirinê Tulay Hatîmogûllari û Tûncer Bakirhan civîna çapemeniyê lidar xistin. Tûncer Bakirhan di îmzekirina qanûna çarçoveyî de axivî û spasiya kesên ku ked dane pêvajoyê kir û Sirri Sureyya Onder bi bîr anî û wiha axivî: “Em rêya Sirri Sureyya Onder bi rê ve dibin û înşelah wê me bibe encamê. Îro ji bo siyaseta Tirkiyeyê rûpeleke nû vedibe. Ji ber ku piştî banga birêz Ocalan cara yekem em siberoja xwe bi hev re dinivisînin. Em ji bo me hemûyan derfeteke û em dixwazin 86 milyon sûdê werbigirin. Ev destpêkeke girîng e. Çawa em kêmasiyên qanûnê rexne dikin lê giringiya wê jî diparêzin. Ji ber ku ji bo Tirkiyeyê deriyeke nû vedike. Weke birêz Ocalan dibêjê, ‘rêyên dirêj bi yek gavê dest pê dike’. Em jî gava yekem diavêjin. Tevî kêmasiyan jî em ê vê qanûnî civakî bikin. Me îro îmzayek avêt. Ev îmze ji aştî û demokrasiyê re hatiye avêtin. Bila ev qanûn ji 86 milyonan re bi xêr be.”
Tulay Hatîmogûllari jî diyar kir ku piştî muzakereyên 2 salan qanûna çarçoveyê ku wê îro pêşkeşî Meclisê bê kirin dîrokî ye û ev yek anîn ziman: “Komîsyona ava bûbû merhaleyeke girîng bû. Rapora komîsyonê jî dîrokî û girîng bû. Yek jî merhaleyên dîrokî çûyîna Komîsyonê li Girava Îmraliyê bû. Pêşkêşkirina qanûna çarçoveyî ji bo Serokatiya Meclisê jî dîrokî û girîng e. Helbet ev qanûn nikare pirsgirêka sed salî çareser bike. Lê ji bo vekirina deriyekî nû dîrokî ye. Ji bo me jî tê wateya vekirina deriyekî ji bo çareseriyê. Ji niha şûn ve jî ji bo ev qanûn bibe pratîk û desteyên bên avakirin pir girîng in. Divê ev qanûn bibe qanûneke binyadî. Pirsgirêka Kurd ne pirsgirêka terorê ye. Em jî vê merhaleyê girîng dibînin. Em hêvî dikin hemû partî jî piştgiriya vê qanûnê bikin. Em bi bawer in ku ev qanûn deriyekî demokrasiyê vebike.”
