Turk di daxuyaniya xwe de ragihand ku li Xezeyê ku di encama êrîşên Îsraîlê de wêran bûye gelek cenaze ku tê texmînkirin ên malbatan e hatine derxistin. Turk, got ku ev yek fikarên li ser sûcên şer ên gengaz û binpêkirinên din ên giran zêde dike.
Turk anî zimên ku herêmeke berfireh ê Xezeyê ji ber bombarduman, wêranî û xebatên rakirina kavilan ên bi makîneyên giran hatiye xerabkirin û hişyarî da ku dibe ku li hin herêman hê jî di binê kavilan de cenaze hebin.
Komîserê Bilind ê Mafên Mirovan ê Neteweyên Yekbûyî, ji bo parastina delîlan bang kir ku destûr bê dan ku lêkolînerên navneteweyî biçin hemû herêmên Xezeyê.
Turk destnîşan kir ku divê nasnameya cenazeyan bê diyarkirin, daneyên tiba qanûnî û nimûneyên biyolojîk werin parastin, cihên goran werin qeydkirin û malbat derbarê aqûbeta xizmên xwe de werin agahdarkirin. NY ragihand ku Îsraîl rê nade makîneyên giran ên ji bo rakirina kavilan bikevin Xezeyê.
Li gorî Komîseriya Bilind ê Mafên Mirovan ê Neteweyên Yekbûyî, Parastina Sivîl a Filîstînê di navbera Mijdara 2025’an û Îlona 2026’an de li seranserê Xezeyê ji binê kavilên avahiyên hilweşiyayî zêdetirî 630 cenaze û bermayiyên mirovan derxistine. Parastina Sivîl, texmîn dike ku di binê kavilan de hê jî bêhtirî 8 hezar kes hebin.
Hat ragihandin ku di navbera 27’ê Hezîranê û 27’ê Tebaxê de ji binê kavilên 20 avahiyên hilweşiyayî 233 cenaze hatine derxistin. Di nav wan de 74 zarok û 106 jin hene. Turk, diyar kir ku nabe ku malbat tenê bi zanîna nasnameya xizmên xwe û definkirina cenazeyên xwe re razî bibin û got ku mafê wan heye ku ‘rastiyê zanibin.’
