Bi Banga Aştî û Civaka Demokratîk re tevgerên sosyalîst ên li Tirkiyeyê nîqaşa li ser zemîna têkoşînê ya hevpar dewam dikin. Dema dawî di çarçoveya nîqaşên li ser têkoşîna hevpar de hin gav jî hatin avêtin.
Herî dawî nûnerên 13 partiyên siyasî li Girtîgeha Edîrneyê serdana Selahattîn Demîrtaş, Selçûk Mizrakli û li Girtîgeha Sîlîvriyê girtiyên ji doza Gezî ziyaret kirin, nêrînên wan wergirtin û têkildarî têkoşîna hevpar daxuyaniyek dan.
Serokê Giştî yê Partiya Tevgera Kedkar (EHP) Hakan Ozturk ku di nava nîqaşên têkoşîna hevpar de ye, ji ANF’ê re qala vê pêvajoyê û nîqaşan kir.
‘TÊKOŞÎNA HEVPAR WÊ BI KERÎ HEMÛ ALIYAN BÊ’
Ozturk ragihand ku xeta têkoşîna hevpar girîng e û got, “Têkoşîna hevpar xwe dispêre feraseta ‘xurtbûna herdu destan li şûna destekî’. Çiqas dest bi hev re tevbigere wê dengekî ewqasî xurt derxîne. Ev yek bingeha lêgerîna vê tifaqê ye. Ji bo mejiyê siyasetê û avakirina hêzeke bi bandor, ev yek pêwîstî ye. Têkoşîna sosyalîstên Kurd û têkoşîna partiyên sosyalîst ji xwe pêvajoyeke ku bi hev re dimeşe û bi dîtina min, ev tifaq bi kêrî hemû aliyan tê.
Her wiha daxuyaniyên Abdullah Ocalan û zemîna nû ya ku tevgera Kurd afirand, kir ku pêşî li têkoşîna aştiyê ya bi rêbazên demokratîk vebe. Emm dixwazin ev pêvajo biçe serî û rêyên vegera li ya berê bê girtin. Ji bo vê jî divê gava destpêkê ya şênber bê avêtin, yanî aştî bê destpêkirin.
Ji bo vê jî weke destpêkeke maqûl a ku her kes qebûl bike, em pêşniyar dikin ku biryarên dadgeriyê bi cih bêne anîn. Em dixwazin ku Tirkiye biryarên dadgehên xwe, biryarên Dadgeha Destûra Bingehîn ên têkildarî Selahattîn Demîrtaş, Fîgen Yuksekdag û girtiyên Gezî bi cih bîne. Ev yek ne tenê daxwazeke siyasî ye, her wiha pêwîstiyeke destûra bingehîn e. Eger pirsgirêkek wê çareser bibe, divê dewlet li gorî hiqûqa xwe tevbigere. Êdî dem hatiye ku gavên şênber bêne avêtin.”
‘SERDANÊN GIRTÎGEHÊ ENCAMÊN ERÊNÎ BI XWE RE ANÎN’
Ozturk ragihand ku gel xeta têkoşîna hevpar bi erênî pêşwazî dike û axaftina xwe bi vî rengî dewam kir, “Hîn avaniyeke şênber nîne, lê belê em li ser sernavên siyasî yên şênber li hev dicivin. Di mijarên weke pêkanînên qeyûm û bicihneanîna biryarên dadgeriyê de derdorên cuda yên siyasî îtirazên weke hev dikin. Mirov dikare li dora van xalên hevpar bicivin.
Pêwîste têkoşîn ne tenê li ser mafên aborî bimîne, divê mafên gelê Kurd û demokrasiyê jî vehewîne. Eger têkoşîna li ser mûçeyê kêmtirîn aliyek be, têkoşîna demokratîkbûna giştî û meseleya Kurd jî aliyê din e. Serdana li girtîgehan di nava civakê de bersiveke erênî dît. Cihê Selahattîn Demîrtaş di nava civakê de heye û van serdanan bandoreke erênî kirin.”
‘BANDORA GOTINÊN NETEWEPERESTIYÊ KÊM DIBE’
Ozturk diyar kir ku civak pêvajoyê êdî hîn baştir fêhm dike û got, “Di nava civakê de guherînek heye. Polîtîkayên neteweperestiyê yên bi salan têne meşandin, bê bandor dibin. Destpêkirina nîqaşa van mijaran li nava desthilatdariyê, bandora gotinên berê kêm dike. Ev rewş ji bo pêşveçûna pêvajoya aştiyê zemîneke siyasî ya girîng diafirîne.”
‘BAWERIYA MIN BI KEVNEŞOPIYA ME YA TÊKOŞÎNA DEMOKRATÎK HEYE’
Ozturk desntîşan kir ku kevneşopiya têkoşîna demokratîk xurt e û got, “Di nava vê civakê de tecrûbeya jiyana bi hev re heye. Eger desthilatdariya siyasî vî zimanê dijberîkirinê biterikîne, wê rageşiya civakî kêm bibe. Mînak berdana Demîrtaş bi xwe dikare atmosfera siyasî bi rengekî cidî biguherîne. Piştre jî wê pêwîstî pê çêbibe ku çarçoveya hiqûqî ya pêvajoya derbasbûnê bê danîn. Tevgerên sosyalîst di vê mijarê de xwedî danheviyê ne.”
‘TÊKOŞÎNA SOSYALÎZMÊ WÊ BILIND BIBE’
Ozturk bal kişand ser bandora pêvajoyê ya li ser têkoşîna sosyalîzmê û got, “Ev pêvajo wê têkoşîna sosyalîzmê bililnd bike. Di asta xwecihî de eger avaniyên kolektîf bêne avakirin hem têkoşîna demokrasiyê hem jî ya kedê wê xurt bibe. Avaniyên ku gel di nav de xwedî mafê gotinê ye, têkoşîna civakî bi pêş ve dibin. Ev jî li nêzîkatiya bingehîn a sosyalîzmê tê.”
