Rejima Îranê di 9’ê Gulana 2010’an de çar têkoşer û şoreşgerên gelê Kurd li gel
şoreşgerek Îranî yên bi navê; Şirîn Elemhulî, Ferzad Kemanger, Ferhad Wekîlî, Elî Heyderyan û Mehdî Îslamyan, li girtîgeha Evîn a Tehranê bi darvekirin. Partiya Jiyana Azad a Kurdistanê (PJAK) bi daxuyaniyekê Şehîdên Sêdarê bi bîr anî.
Di daxuyaniyaniya PJAK’ê de wiha tê gotin: “Îro 16 sal di ser darvekirina hevalên me yên hêja Ferzad Kemanger, Şîrîn Elemhulî, Ferhad Wekîlî û Elî Heyderyan re derbas dibin. Em bi vê wesîleyê wan bibîrtînin. Ev hevalên me yên şehîd zindîkerên şoreşa gelên Îranê û pêşengên têkoşînê bûn. Bi îradeyek xurt pêşengtî ji vê şoreşê re kirin. Ew di serdemekî de ku rûyê komara îslamî baş nedihat naskirin, bûn têkoşerên berxwedana li dijî rejîma zordar.
Meha Gulanê ji bo tevgera azadixwaz a gelê Kurd meha şehîdan û qehremaniyên şoreşgerî yên Kurdên çavnetirs ên li hemberî rejîmên sitemkar ên li ser Kurdistanê ne. Di vê mehê de dîrokek ji fedakariyên mînak ên wekî; Che Guevara, Deniz Gezmiş, Xesrew Gulsurxî û Keramet Danişiyan şekil girtiye ku mîratgirên wan ên rastîn hevalên wekî; Heqî Karer, Mihemed Karasungur, Îbrahîm Bilgîn, Xelîl Çavgun û Mizgîn in. Rêya wan a bi rûmet ji aliyê hevalên hêja Kemanger, Elemhûlî, Heyderiyan û Wekîlî ve li ser şopa bidestxistina azadiyê ji bo gelê herî bindest, yanî gelê Kurd û gelên dibin zilma Îranê de, hat domandin.
Hevalên me yên hêja û pêşengên rastîn ên têkoşîna gelê me, Ferzad Kamanger, Şirîn Elemholî, Ali Heydaryan û Ferhad Wekîlî, di 9’ê Gulana 2010’an de ji aliyê rejîma zalim û komkujer ya Îranê ve bi armanca tinekirina têkoşîna rewa ya gelê Kurd li Rojhilatê Kurdistan û Îranê hatin darvekirin.
Ev hevalên me, bi îradeya xwe ya polayî rêya asê ya têkoşînê li Rojhilatê Kurdistan û Îranê vekirin û hêviya asoya azadiyê di paşeroja gelan de zindî kirin.
Îro, tiştê ku di bin navê pêlên şoreşgerî û rêxistinbûna gel de ji bo gihîştina bi azadiyê li Îran û Rojhilatê Kurdistanê heye, li ser bingehên xurt ên heman têkoşîna pratîkî, fedakariya mezin û fedaîtiya şehîdên 9’ê Gulanê hatiye avakirin. Îro bi saya şehîdên xwe em gihîştine vê rêça binirx ya azadîxwazî û demokrasîxwaziyê. Wan tovê şêweyekî bêhempa yê şoreşa civakî li dijî rejîma zordar çandin ku paşê me berhema wê di şoreşa ‘Jin, Jiyan, Azadî’ de bi zelalî dît û ev tevgera guhertinxwaz hîn jî berdewame.
Têkoşîna van şehîdan gihandina hewara Kurdan ya bi Îraniyan û cîhanê bû û xistina rojevê ya pirsgirêka Kurd bû ku rejîma Îranê hertim dixwest bide ji bîrkirin. Lê vê rejîmê serî li darvekirinê da. Lê nekarî dengê gelê Kurd bêdeng bike. Ji berku gelê me hewara azadîxwaziyê ya Kemanger û rêhevalên wî bihîst û ji wê demê ve serhildanên demokratîk li seranserî Îranê xurtir bûn û îro jî destkeftiyên wê dibînîn.
Xebata gelan êdî di warê şêwazên nerazîbûn, serhildan û şoreşgeriyê de qonaxek dîrokî bi temamî cûda li pey xwe de hişt. Ji ber vê yekê yekana çeka rejîma Îranê ango sêdare, nekarî bibe asteng li ber lêhiya mezin a gelên ku li ser cadeyan amade bûn. Rejîma Îranê di 9’ê Gulana 2010’an de bi vê armancê hevalên me bidarvekir daku xeta berxwedanê ya bê hempa a girtiyên siyasî ya di girtîgehan de ku gihiştibû lûtkeyê bişkîne. Lê Kemanger û rêhevalên wî bi fedakirina canê xwe rê bi vê zilmê nedan. Îro jî serhildana gelan li ser rêbaza van şehîdan berdewame.
Partiya Jiyana Azad a Kurdistanê (PJAK) hevalên şehîd; Ferzad Kemanger, Elî Heyderiyan, Şîrîn Elemhulî û Ferhad Wekîlî bi bîr tîne. Îro ku bi saya şoreşa gelan, Îran li ber xala werçerxaneke dîrokî ye û rejîma Komara Îslamî li ber hilweşandinê ye, rejîm rûbirûyê şerekî wêranker bûye; lê şoreşa gelan xwedî heman hêviya azadiyê, têkoşîna li qadan û kolanan û daxwazên demokratîke ku heta bi dest xistina hemû azadiyên xwe dest ji têkoşînê bernade.
Berxwedana îro ya jinan a di girtîgehan de, berdewamiya berxwedana şehîdên 9’ê Gulanê ye. Meha Gulanê meha şehîdane, lewma em bang li hemû çîn û beşên civakê, bi taybetî demokrat, azadîxwaz, jin, ciwan, karker, rewşenbîr û mamostayan dikin ku bi xwedîderketina li destkeftiyên şehîdan, bi hevkarî, yekîtî û tifaqa xwe ya herdemî, pêngavên xwe yên demokratîk û rêxistinbûna xwe xurt bikin.
Guman tê de tune ye ku çalakiyên girseyî yên bi dirûşma “Na ji sêdarê re, belê ji demokrasiyê re” wê di encamê de berhemên xwe hebe. Ev pêla darvekirinan ya ku rejîma Îranê di nava şer de daye destpêkirin, nîşaneya têkçûna wê ye û ber bi hilweşînê ve diçe. Careke din em şehîdên 9’ê Gulanê bi bîr tînin û heta azadiya gelan, emê rêya wan bidomînin.”
