Di 6’ê Çileya 2026’an de komên El-Emşat, El-Hemzat, Sultan Murad û Nureddîn Zengî ên girêdayî Hikumeta Demkî û piştgirî ji dewleta Tirk digirin, êrîşên berfireh li ser taxên Şêxmeqsûd, Eşrefiyê û Benî Zêd ên Helebê kirin. Di êrîşan de zêdeyî 80 tank û 42 hezar çekdarên ku ji her derê Sûriyeyê kom kiribûn hatin bikaranîn. Êriş bi taybetî li qadên sivîlan dihatin kirin. Li hember van êrişan şervanên Hêzên Ewlekariya Hundirîn berxwedaneke dîrokî meşandin.
Yek ji şahidên berxwedana taxa Şêxmeqsûdê û şervanê Hêzên Ewlekariya Hundurin a Helebê Hemze Hebeş ê ku bi konvoya ji taxa Şêxmeqsûdê ber bi herêmên Bakûr û Rojhilatê Sûriye ve hatiye qala kêliyên êrîş û berxwedanê kir û got, “Êrişên ku bi ser taxê de hatine kirin ji aliyê çeteyên El-Emşat û El-Hemzat ve li taxa Eşrefiyê destpê kir. Bi wan êrişan dixwestin tevgerek di aliyê me de çêbibe, lê ruxmê wê jî me bersiva wan êrîşên destpêkê neda da ku şerekî mezin rû nede. Heta astekê em li hember wan êrîşan bêdeng bûn. Di kêliyê wan êrîşan de ji me xwestin ku em ji nuqta xwe vekişin, em nuqteyekê şûnde vekişîn ji bo ku ew şer bisekine. Lê piştî wê di nav çend kêliyan de êrîş zêdetir bûn û yekser sivîl û zarokan hatin hedefgirtin”
Hemze Hebeş anî ziman ku ew êrîş bi hinceta hebûna QSD’ê di taxê de hate kirin û got, “Lê di taxên Şêxmeqsûd û Eşrefiyê de QSD tune bûn. Hemû sivîl û cihên xizmetguzariyê û nexweşxaneya Şehîd Xalid Fecir hatin hedefgirtin. Li nexweşxaneya Xalid Fecir bi 8 tanka û droneyan êrîş çêbûn û jiyana karmend û nexweşên wir di xeteriyeke mezin de bû.”
Yek ji ji berxwedêrên taxa Şêxmeqsûd Siyamend Cafer jî diyar kir ku êrîşên çêbûne hemû dezgehên xizmetguzariyê hedefgirtin û got, “Nexweşxaneya Şehîd Xalid Fecir bi awayekî rasterast hate hedefgirtin, lê Hêzên Ewlekariya Hundurîn bersiva wan êrîşan dan û hemû hewildan û derfetên ji bo parastina gel û zarokan dan pêş. Li gel rewşa dijwar û giran berxwedanê hefteyekê dirêj kir.”
