Seroka Rêxistina PASS û çalakvana Yemenî Behiya El Seqaf bi peyamekê piştgiriya xwe bi YPJ’ê re anî ziman.
Behiya El Seqaf di peyama xwe de got: “Wek jineke Ereb, ez piştgiriya xwe ya mirovî bi jinên Kurd ên Yekîneyên Parastina Jinan (YPJ) û têkoşîna wan re tînim ziman. Têkoşîna wan a li dijî tundî û terorîzmê nîşaneyek e ku rola jinan di nava civaka me de jinûve pênase kir.”
Behiya El Seqaf destnîşan kir tiştê ku şervanên YPJ’ê kirine ne tenê bi aliyê leşkerî ve sînordar e, lê ji wê wêdetir diçe û dibe modelek berxwedana femînîst, qalibê ku têgehên parastin û hêzê bi mêran ve girêdide dişkîne, her wiha piştrast dike ku jin dikarin di parastina xwe, civaka xwe û rûmeta xwe de di rêza pêşîn de bin.
Çalakvana Yemenî di peyama xwe de diyar kir ku pirsgirêkên jinan “nayên parçekirin û ne girêdayî sînorên erdnîgarî an girêdayîbûnên neteweyî an olî ne, lê pirsgirêkek mirovî ye. Pêkanînên jin li her deverê pê re rû bi rû dimînin, berdewama êşeke hevpar e ku hevgirtineke bêsînor hewce dike.”
Behiya El Seqaf da zanîn ku têkoşîna jinên Kurd, îrade û fedakariyên wan ji jinên cîhanê re bûne îlham û got, rêya ber bi azadî û wekheviyê bi şikandina qalibên serwer û cudakariyê û bi avakirina feraseteke civakî ya li ser esasê edaletê dest pê dike.
Serokê Rêxistina PASS û çalakvana ji Yemenê Behiya El Seqaf di dawiya peyama xwe de anî ziman ku hevgirtina jinan hêza pêkanîna guhertinê ye û got “Dozên jinan me dikin yek.”
