Sroş Keremî yê 18 salî ku di xwepêşandanên di 28’ê Kanûna 2025’an de li Îranê dest pê kirin û bi taybetî li Rojhilat û gelek bajaran belav bûn, li Kirmaşanê jiyana xwe ji dest da, cenazeyê wî piştî 6 meh û 19 rojan radestî malbata wî hat kirin û bi merasîmek girseyî hat veşartin.
Cenazeyê Keremî yê ku di 8’ê Çileyê de ji aliyê hêzên rejîma Îranê ve bi çekên agiran hatibû qetilkirin, di 28’ê Tîrmehê de radestî malbata wî hat kirin. Cenazeyê Keremî piştre birin bajarê lê jidayikbûye, gundê Lanjap ê li navçeya Sungurê hat veşartin.
TEVLIHEVÎ BI TESTA DNA’YÊ DERKET HOLÊ
Li gorî agahiyan cenazeyê Sroş Keremî bi xeletî wekî yê Emîr Elî Heyderî yê 17 salî yê ku di 8’ê Çileyê de li heman herêmê hatibû qetilkirin, hatiye naskirin û radestî malbata wî hatiye kirin. Malbata Heyderî, ji ber ku bawer dikirin ku cenaze yê kurê wan e cenaze veşart.
Tê hînbûn ku malbatên Keremî û Heyderî ji bo tespîtkirina nasnameya cenazeyan bi qasî heft mehan têkoşîna qanûnî meşandin. Di encama testa DNA’yê hat tespîtkirin ku cenazeyê ku radestî malbata Heyderî hatiye kirin aîdî Sroş Keremî ye.
Di encama lêkolînê dederket holê ku cenazeyê Emîr Elî Heyderî li goreke bênav hatiye veşartin.
BI GIRSEYÎ HAT VEŞARTIN
Piştî testa DNA’yê cenazeyê Sroş Keremî ji gorê hat derxistin û radestî malbata wî hat kirin. Keremî piştî merasîmeke girseyî li gundê Lanjapê hat veşartin.
Hat ragihandin ku malbata Emîr Elî Heyderî jî beşdarî merasîma cenazeyê bû û hevxemiya xwe bi malbata Keremî re nîşan da.
